سعودی حکومت نے حج 2025ء کیلئے مخصوص ویکسین لازمی قرار دیدی

(ویب ڈیسک)سعودی حکومت نے حج 2025ء کے لیےمخصوص میننجائٹس ویکسین لازمی قرار دے دی۔

سعودی وزارتِ حج و عمرہ کے مطابق حج میں تمام شہریوں اور غیرملکیوں کو میننجائٹس ویکسین لگوانا ہو گی، ویکسینیشن کے بغیر حج کرنے کی اجازت نہیں دی جائے گی۔

وزارت حج و عمرہ کے نئے اعلان کے مطابق بغیر ویکسینیشن حج پیکجز اور رجسٹریشن ممکن نہیں ہو گی۔

وزارتِ حج و عمرہ کا کہنا ہے کہ دورانِ حج متعدی بیماریوں کا پھیلاؤ روکنا وقت کی ضرورت بن گیا ہے۔

اس سے قبل جنوری میں سعودی وزارتِ صحت کی جانب سے عمرہ زائرین کے لیے صحت کے اصول جاری کیے گئے تھے۔

سعودی سول ایوی ایشن گاکا کی جانب سے جاری نوٹیفکیشن کے مطابق عمرہ زائرین کے لیے تمام ضروری ویکسینیشن اور احتیاطی تدابیر لازمی ہوں گی، مسافروں کو صحت سے متعلق دستاویزات، بشمول ویکسینیشن سرٹیفکیٹ ساتھ لانے کی ہدایت کی گئی ہے۔