لاک ڈاؤن میں شراب نہیں ملتی سینیٹائزر پیو۔۔۔ 7بھارتی ہلاک

(24 نیوز) بھارت میں شراب نہ ملنے پر منشیات کے عادی افراد نے سینیٹائزر پی لیا جس کی وجہ سے 7افراد کی موت ہوگئی ۔

بھارتی نجی ٹی وی کی رپورٹ کےمطابق کورونا کے بڑھتے ہوئے خطرات کے پیش نظر  بھارت کی ریاست مہارشٹرا میں لاک ڈاؤن نافذ ہے ۔ ضروری خدمات کو چھوڑ کر کسی اور دکان کو کسی قسم کی کوئی سہولت نہیں دی گئی ہے ۔ ایسی صورتحال میں منشیات کے عادی کو بہت ساری پریشانیوں کا سامنا کرنا پڑ رہا ہے ۔ نوبت یہاں تک پہنچ گئی ہے کہ منشیات کی طلب پوری کرنے کیلئے سینیٹائزر کا استعمال شروع کردیا ہے ۔ لاک ڈاؤن میں شراب نہ مل سکی تو طلب مٹانے کیلئے سینیٹائزر پی لیا ، جس کی وجہ سے 7افراد کی موت ہوگئی ۔ رپورٹ کے مطابق یہ حیران کن اور افسوسناک واقعہ ایوت محل کے وانی میں پیش آیا ۔ لاک ڈاؤن کے دوران شراب کی دکان بند ہونے کی وجہ سے اپنی طلب پوری کرنے کیلئے کئی لوگوں نے سینیٹائزر پی لیا ، جس کی وجہ سے ان سب کی موت ہوگئی ۔ سینیٹائزر پی کر مرنے والے پانچ افراد کے نام دتہ لانجیوار ، نوتن پٹھارٹکر ، گنیش ناندیکر ، سنتوش میہر اور سنیل ڈھینگلے بتائے گئے ہیں ۔موصولہ اطلاعات کے مطابق دتہ 47 سال نے رات 9 بجے کے قریب سینیٹائزر پی لیا اور سینے میں درد کی شکایت کے بعد اسے ہسپتال میں داخل کرایا گیا ، جہاں رات 11 بجے کے قریب اس کی موت ہوگئی ۔ اسی طرح نوتن پٹھارٹکر 33 سال نے بھی رات کے وقت سینیٹائزر پی لیا اور رات کو اس کی موت ہوگئی ۔ باقی دوسروں کی بھی اسی طرح سینیٹائزر پینے کی وجہ سے موت ہو گئی ۔ لاشوں کو پوسٹ مارٹم کے لئے دیہی ہسپتال بھیج دیا گیا ہے ۔ پولیس نے مقدمہ درج کرکے مزید  پڑتال شروع کردی ہے ۔

یہ بھی پڑھیں: بھارت: روزہ رکھ کر 4 ماہ کی حاملہ نرس کرونا مریضوں کی خدمت میں مصروف