بھارتی میڈیا چیمپئنز ٹرافی سے متعلق پروپیگنڈا کر رہا ہے:عطا اللہ تارڑ

(24 نیوز)وفاقی وزیر اطلاعات عطااللہ تارڑ نے کہا ہے کہ بھارتی میڈیا چیمپئنز ٹرافی سے متعلق جھوٹا بے بنیاد اور من گھڑت پروپیگنڈا کر رہا ہے۔

ایک بیان میں عطااللہ تارڑ نے کہا کہ یہ سب بھارتی کرکٹ بورڈ کی ایما پر کیا جا رہا ہے جسے پاکستان میں آئی سی سی ایونٹ کا کامیابی سے انعقاد ہضم نہیں ہو رہا۔

انھوں نے کہا کہ بھارتی بورڈ کے زير سایہ بھارتی میڈيا کا پاکستان کے خلاف پروپیگنڈا مسترد کرتے ہيں، پاکستان میں سپورٹس کو سبوتاژ کرنا بھارت کی مذموم کوشش ہے۔

وزیر اطلاعات نے کہا کہ پاکستان کے میدانوں میں کرکٹ کا ہونا دنیا بھر کے لوگوں کی جیت ہے، جس کا ایک بڑا ثبوت یہاں پر آسٹریلیا اور انگلینڈ کے میچ میں عوام کا بھرپور جوش و خروش ہے۔

انھوں نے کہا کہ چیمپئنز ٹرافی سے متعلق بھارتی میڈیا میں چلنے والے تھریٹ الرٹ جعلی اور بے بنیاد ہیں، پاکستان انہيں مسترد کرتا ہے۔

مزید پڑھیں : ہارس اینڈ کیٹل شو کی اختتامی تقریب، مریم نوازاور آرمی چیف کی خصوصی شرکت