حارث، نسیم اور شاہین سے چھٹکارا حاصل کرنے کا مشورہ

 (24  نیوز)پاکستان کے سابق کپتان محمد حفیظ نےخراب کارکردگی کے بعد قومی ٹیم کے تینوں فاسٹ بولرز شاہین آفریدی، نسیم شاہ اور حارث رؤف کو تنقید کا نشانہ بنایا ہے۔

ایک پروگرام میں  حفیظ نے مایوسی کا اظہار  کرتے ہو ئے کہا کہ تینوں نے 2023 کے ایشیا کپ کے بعد سے مسلسل ناقص کارکردگی کا مظاہرہ کیا۔

محمد حفیظ نے کہا کہ شاہین آفریدی، نسیم شاہ اور حارث رؤف تینوں ہی 2023 کے ایشیا کپ، ون ڈے ورلڈکپ، ٹی ٹوئنٹی ورلڈکپ اور اب چیمپئنز ٹرافی میں اچھی پرفارمنس دینے میں ناکام رہے ہیں۔

انہوں نے کہا اب یہ تسلیم کرنے کا وقت ہے کہ ٹیلنٹ کے باوجود ان تینوں نے خود کو پاکستان کے لیے بڑا ٹورنامنٹ نہیں جتوایا، اب وقت ہے کہ ہم آگے بڑھیں اور دوسرے بولرز جیسے محمد علی، خرم شہزاد، محمد وسیم جونیئر، عاکف جاوید اور میر حمزہ کو موقع دیں۔ 

مزید پڑھیں:  شعیب اختر بھی قومی ٹیم کی پرفارمنس پر آگ بگولہ

حفیظ کا کہنا تھا کہ یہ کھلاڑی اپنے مواقع کا انتظار کررہے ہیں، وہ بھی پاکستانی ہیں اور وہ ایک موقع کے مستحق ہیں، ان کے پاس بھی پاکستانی پاسپورٹ ہے۔

دوسری جانب بابراعظم سے متعلق بات کرتے ہوئے سابق کپتان نے کہا کہ بابر  گزشتہ 10 سالوں سے پاکستان کے لیے کھیل رہے ہیں لیکن وہ پاکستان کو بھارت کے خلاف ایک بھی فتح دلانے میں مدد نہیں کر سکے۔

ان کا کہنا تھا کہ بابر کو اب نمبر تین پر مستقل کھلانا چاہیے تاکہ ٹیم کا مڈل آرڈر مضبوط ہو، رضوان، بابر اور سلمان علی آغا مل کے اچھا مڈل آرڈر بن سکتے ہیں۔