عدالت نے فواد چودھری کو اسلام آباد لے جانے کی اجازت دیدی

(24 نیوز) الیکشن کمیشن کے خلاف ہرزہ سرائی، متنازعہ بیانات کے کیس میں عدالت نے فواد چودھری کو میڈیکل کروانے کے بعد اسلام آباد لے جانے کی اجازت دے دی۔

جوڈیشل مجسٹریٹ کینٹ مدثر حیات کی عدالت میں الیکشن کمیشن کے خلاف ہرزہ سرائی اور متنازعہ بیانات کے کیس کی سماعت ہوئی۔ فوادچودھری کو عدالت میں پیش کیا گیا۔

وکیل فواد چودھری نے موقف اپنایا کہ سفری ریمانڈ نہیں بنتا، فواد چودھری کی ہتھکڑی کھولی جائے، دونوں کے بجائے ایک ہاتھ پر ہتھکڑی لگائیں۔ جس پر عدالت نے کہا کہ آپ فضول باتوں میں وقت ضائع کر رہے ہیں۔ وکیل نے کہا کہ جج صاحب قانون کے مطابق فیصلہ کریں۔ فاضل جج نے فواد چودھری کو چیمبر میں بھجوا دیا۔

فواد چودھری نے عدالت کو بتایا کہ مجھے پوری رات چہرے پر پٹی باندھ کر رکھا جیسے میں دہشتگرد ہوں۔ وکیل نے کہا کہ الیکشن کمیشن کیخلاف ایک بیان دینے پر مقدمہ نہیں بنتا۔ عدالت نے محفوظ فیصلہ سناتے ہوئے فواد چودھری کو اسلام آباد لے جانے کی اجازت دے دی۔

خیال رہے پولیس نے پاکستان تحریک انصاف کے رہنما فواد چوہدری کو صبح سویرے ان کے گھر سے گرفتار کیا۔

فواد چوہدری کو پولیس نے ان کے گھر سے ابھی گرفتار کرلیا ہے۔ امپورٹڈ حکومت بوکھلاہٹ کا شکار ہوگئی ہے

— Farrukh Habib (@FarrukhHabibISF) January 25, 2023

پی ٹی آئی رہنما فرخ حبیب نے سماجی رابطے کی ویب سائٹ پر ٹوئٹ کیا کہ رہنما تحریک انصاف فواد چوہدری کو پولیس نے ان کے گھر سے گرفتار کرلیا، امپورٹڈ حکومت بوکھلاہٹ کا شکار ہوگئی ہے۔

پولیس کی یہ گاڑیاں فواد چوہدری کو گرفتار کرکے لے جارہی ہے pic.twitter.com/CJXiAHO3fQ

— Farrukh Habib (@FarrukhHabibISF) January 25, 2023

رہنما تحریک انصاف فرخ حبیب نے فواد چوہدری کو گرفتار کرنے والوں کی گاڑیوں کی ویڈیوز بھی ٹوئٹر پر شئیر کردیں۔ تاہم اب تک پولیس کی جانب سے پی ٹی آئی رہنما فواد چوہدری کی گرفتاری کی تصدیق نہیں کی گئی۔

دوسری جانب فواد چوہدری کے چھوٹے بھائی فیصل حسین نے ٹویٹ کیا کہ ان کے بڑے بھائی سابق وفاقی وزیر چوہدری فواد حسین کو تھوڑی دیر قبل بغیر نمبر پلیٹ والی گاڑیوں میں نامعلوم افراد نے غیر قانونی طریقہ سے لاہور کے گھر سے اٹھایا ہے، اغوا کنندگان نے وارنٹ دکھائے ہیں نہ اپنی شناخت ظاہر کی۔

میرے بڑے بھائی سابق وفاقی وزیر چوہدری فواد حسین صاحب @fawadchaudhry کو تھوڑی دیر پہلے بغیر نمبر پلیٹ گاڑیوں میں نامعلوم افراد نے غیر قانونی طریقہ سے لاہور گھر سے اٹھایا ہے۔ اغوا کنگدگان نے وارنٹ دکھائے گئے ہیں نا اپنی شناخت باہر کی ہے۔

— Faisal Hussain (@faisal_fareed) January 25, 2023

قبل ازیں پی ٹی آئی کے سوشل میڈیا اکاؤنٹ سے آج رات 2 بجے عمران خان کی گرفتاری کے خدشہ کا اظہار کیا گیا تھا جس کے بعد رہنما تحریک انصاف فواد چوہدری نے میڈیا سے گفتگو بھی کی تھی۔