صدر مملکت کا پاکستان آرفن کیئر فورم کے زیرِ کفالت یتیم بچوں کے لیے ایوانِ صدر میں افطار ڈنر

(اویس کیانی )صدر آصف علی زرداری کی جانب سے پاکستان آرفن کیئر فورم کے زیرِ کفالت یتیم بچوں کے لیے ایوانِ صدر میں افطار ڈنر کا اہتمام کیا گیا۔

صدر مملکت نے رمضان المبارک کی بابرکت ساعتوں اور خوشیوں میں یتیم بچوں کو شامل کرنے کے لیے افطار ڈنر کا اہتمام کیا، اس موقع پر صدر مملکت نے اظہار خیال کرتے ہوئے کہا کہ بچے ہمارا مسقبل ہیں۔

انھوں نے کہا کہ بچے اپنی تعلیم پر خصوصی توجہ دیں، بچے محنت کریں تاکہ کامیاب انسان بن سکیں، آپ سب مجھے اپنے بچوں کی طرح عزیز ہیں۔

صدر مملکت نے آرفن کیئر فورم کے زیرکفالت بچوں میں بطور تحفہ کمپیوٹر ٹیبلٹس بھی تقسیم کیے، آصف زرداری نے کہا کہ خاتون اول آصفہ بھٹو زرداری کے مشورے پر آپ کو کمپیوٹر ٹیبلیٹس کاتحفہ دے رہا ہوں۔

انھوں نے کہا کہ تمام بچے کمپیوٹر ٹیبلیٹس کو تعلیم حاصل کرنے اور سیکھنے کیلئے استعمال کریں، صدر مملکت نے بچوں سے ملاقات کی، شفقت کا اظہار بھی کیا۔

تقریب سے پاکستان آرفن کیئر فورم کے چیئرمین ایئر مارشل ریٹائرڈ فاروق حبیب نے خطاب کرتے ہوئے کہا کہ پاکستان میں ایک اندازے کے مطابق 46 لاکھ یتیم بچے ہیں۔

انھوں ںے کہا کہ پاکستان آرفن کیئر فورم اور اس سے منسلک ادارے ملک بھر میں 1 لاکھ 20 ہزار کے قریب بچوں کی کفالت کر رہے ہیں، فورم ملک میں یتیم بچوں کے حقوق کیلئے آواز بلند کررہا ہے۔

چیئرمین پاکستان آرفن کیئر فورم نے کہا کہ یتیم اور محروم بچوں کی کفالت معاشرے کی مشترکہ ذمےداری ہے، یتیم بچوں کی ایوانِ صدر میں میزبانی اور حوصلہ افزائی پر صدر مملکت کا شکریہ ادا کیا گیا۔