فوجی عدالتوں سے 9 مئی کے مزید ملزمان کو سزاؤں پر چیئرمین پی ٹی آئی کا ردعمل آگیا

(24نیوز) فوجی عدالتوں سے 9 مئی کے مزید 60 ملزمان کو دی جانے والی سزاؤں پر چیرمین پاکستان تحریک انصاف( پی ٹی آئی) بیرسٹر گوہر نے رد عمل دیتے ہوئے کہا ہے کہ ان سزاؤں کے خلاف اپیلیں دائر ہوں گی۔

چیئرمین پی ٹی آئی بیرسٹر گوہر نے کہا کہ کہ ہمارا مطالبہ ہے کہ 9 مئی اور 26 نومبر واقعات پر جوڈیشل کمیشن بنایا جائے، 9 مئی میں کون ملوث تھا اس کا فیصلہ فیئر ٹرائل کے ذریعے ہونا چاہیئے، 9 مئی میں سزا یافتہ لوگوں کے لیے اپیلیں فائل کریں گے۔

بیرسٹرگوہر نے کہا کہ بانی پی ٹی آئی عمران خان نے ہمیشہ 9 مئی واقعات کی مذمت کی، کسی بھی سویلین کا ملٹری ٹرائل نہیں ہونا چاہیئے، یہ معاملہ ابھی بھی سپریم کورٹ میں زیرسماعت ہے، سپریم کورٹ کے فیصلے سے اچھے کی ہی امید ہے، امید ہے کہ سپریم کورٹ کا فیصلہ سویلین کے حق میں ہی آئے گا۔

ان کا مزید کہنا تھا کہ ملٹری ٹرائل صرف ان کا ہونا چاہیئے جو یونیفارم یا ریٹائرڈ ہو، ملٹری کورٹس میں سویلین کا ٹرائل غیر آئینی سمجھتے ہیں۔

 واضح رہے ملٹری کورٹ نے آج سانحہ 9 مئی میں ملوث مزید 60 ملزمان کو سزائیں سنا دیں اور حسان نیازی کو 10 سال قید بامشقت کی سزا شنائی گئی۔

یہ بھی پڑھیں: سانحہ 9 مئی: عمران خان کے بھانجے سمیت مزید 60 مجرموں کو سزائیں