دبئی سے آنے والی پرواز میں نشے میں دھت مسافر کا عملے پر حملہ، ویڈیو منظرعام پر آگئی

(ویب ڈیسک) دبئی سے اسلام آباد آنے والی پرواز میں نشے میں دھت مسافر کی عملے کے رکن پر حملہ کرنے کی ویڈیو منظرعام پر آگئی۔

ذرائع کے مطابق دبئی سے وفاقی دارالحکومت اسلام آباد آنے والے نجی ائرلائن کی ایک پرواز میں شراب کے نشے میں دھت مسافر نے ہنگامہ آرائی کی اور دوران پرواز عملے کے ایک رکن کو گھونسہ دے مارا۔

بعد ازاں ائرلائن اسٹاف نے مسافر کو قابو کرکے طیارے میں بٹھائے رکھا۔ پائلٹ کے کنٹرول ٹاور کو آگاہ کیے جانے پر نیو اسلام آباد ائرپورٹ پر سے ایس ایف کو الرٹ کردیا گیا اور طیارے کی لینڈنگ کے بعد حسن نامی مسافر کو ہتھکڑی لگا کر تحویل میں لے کر طیارے سے اُتارا گیا۔

مزید پڑھیں: ’’چیمہ، چٹھہ اینڈ باجوہ‘‘ریحام خان نے پنجابی فلم  بنانے کا اعلان کردیا

نشے میں دھت مسافر کو کڑی نگرانی میں اے ایس ایف کنٹرول روم منتقل کرکے پوچھ گچھ کی گئی۔ مسافر نے ائرلائن انتظامیہ سے تحریری معافی مانگ لی، جس پر اسے گھر جانے کی اجازت دے دی گئی۔ ذرائع کے مطابق مسافر اسلام آباد کا رہائشی بتایا جاتا ہے۔