تحریک تحفظ آئین پاکستان کا اجلاس نہیں ہونے دیا گیا: بابر اعوان

(24نیوز)پاکستان تحریک انصاف (پی ٹی آئی) کے رہنما بابر اعوان کا کہنا ہے کہ تحریک تحفظ آئین پاکستان کا اجلاس نہیں ہونے دیا گیا، مطلب یہ نظام آئین کے خلاف ہے۔

اسلام آباد ہائی کورٹ کے باہر میڈیا سے گفتگو کرتے ہوئے انہوں نے کہا کہ وہ چاہتے ہیں کہ ملک بنانا ریپبلک ہو اس میں کوئی آواز نہ اٹھے، اس تمام کے باوجود میٹنگ بھی ہو گی، لوگ بھی نکلیں گے اور آواز تو اٹھتی رہے گی۔

بابر اعوان کا کہنا ہے کہ چیف جسٹس کے ساتھ ملاقات میں ہمارے مطالبات کا ایک حصہ پٹیشنز کی حد تک مانا گیا، ہماری ضمانتوں کے خلاف سرکار کی درخواستیں تو فکس ہو گئی ہیں۔

 پی ٹی آئی کے رہنما نے کہا کہ جو لوگ دو دو سال سے اندر ہیں، ان کے خلاف کوئی ثبوت نہیں تو ان کو رہا کیا جائے،ان کا کہنا ہے کہ پیکا ایکٹ سے متعلق پانچوں ہائی کورٹس میں پٹیشنز آگئی ہیں، سپریم کورٹ میں بھی آرٹیکل 184 (3) کے تحت کچھ لوگوں نے پٹیشن دائر کی ہے۔

انہوں نے مزید کہا کہ اگر ایک ہی ایشو سب ہائی کورٹس میں ہو تو سپریم کورٹ یکجا کر کے لارجر بینچ بنا سکتی ہے، سپریم کورٹ پبلک انٹرسٹ کے زمرے میں لارجر بینچ بنا سکتی ہے۔

بابر اعوان کا یہ بھی کہنا ہے کہ پی ٹی آئی کا مطالبہ ہے جتنے بھی کیسز ہیں ان سب اکٹھے کر کے سپریم کورٹ سنے۔