یہی ٹیم بیسٹ تھی، ہیڈ کوچ عاقب جاوید کھلاڑیوں کے دفاع میں سامنے آگئے

(24 نیوز )قومی کرکٹ ٹیم کے عبوری ہیڈ کوچ عاقب جاوید  نےٹیم کا دفاع کر تے ہوئے  کہا ہے کہ یہی ٹیم بیسٹ تھی ،ایک بھی ایسا کھلاڑی نہیں ہے جو بغیر پرفارمنس ٹیم میں آیا ہو اور ایسا تو نہیں ہوسکتا جو ہار گئے ان کو بدل دیں اور انڈر 19 ٹیم کو لائیں۔

راولپنڈی میں پریس کانفرنس کرتے ہوئے عاقب جاوید نے کہا کہ کھلاڑی افسردہ ہیں، جب ٹیم توقعات کےمطابق نہیں کھیلتی تو سب سےزیادہ دکھ کھلاڑیوں کو ہوتا ہے۔

انہوں نے کہا کہ بھارتی ٹیم بہت تجربہ کار تھی اور 240 رنز کا دفاع کرنا ہو تو وکٹیں لینا ہوتیں، اٹیک کرنا ہوتا ہے اور بھارت کے خلاف صرف پلاننگ نہیں ہوتی،ہر میچ کےلیے ہوتی ہے۔

صحافی کی جانب سے ٹیم سلیکشن پر مطمئن ہونے کے سوال پر  ہیڈ کوچ نے جواب دیا کہ مطمئن کبھی نہیں ہوسکتے مگر  یہ جو ہماری ٹیم تھی یہی بیسٹ اور ممکنہ ٹیم تھی۔ 

یہ بھی پڑھیں:آئی سی سی رینکنگ میں فخر زمان اور محمد رضوان کی تنزلی

عاقب جاوید کا کہنا تھا کہ جس نے ایک میچ کھیلا ہم کہہ رہے ہیں وہ ہوتا تو پاکستان میچ جیت جاتا، ایک بھی ایسا کھلاڑی نہیں ہے جو بغیر پرفارمنس ٹیم میں آیا ہو، ٹیم کو بنانے میں ہماری سوچ تھی کہ بہترین ٹیم بنائیں۔ 

انہوں نے کھلاڑیوں کی جانب سے کارکردگی نہ ہونے کا اعتراف کرتے ہوئے کہا کہ یہ حقیقت ہے کہ ہماری پرفارمنس نہیں آرہی ہے، بہتری تو لانی ہے، اس پروسیس کو کوئی روک نہیں سکتا۔ 

عاقب جاوید نے کہا کہ سلیکشن کمیٹی کا کام بہترین کھلاڑی کھلانا ہے، اب وہی کریں گے آگے جو اس ٹیم کے لیے بہتر ہے مگر  ایسا تو نہیں ہوسکتا جو ہار گئے ان کو بدل دیں اور انڈر 19 ٹیم کو لائیں، ہم اپنی کوشش میں لگے رہیں گے، اب ہم خود کو ٹیم کو کل کے میچ کیلیے تیار کریں گے۔