قابل تجدید توانائی ہماری بقا اور وقت کی اہم ضرورت ہے، مریم نواز

(24نیوز)وزیرِاعلیٰ پنجاب مریم نواز شریف نے کہاہے کہ  کلین اور قابل تجدید توانائی ہماری بقا اور وقت کی اہم ضرورت ہے۔

کلین انرجی کے عالمی دن پر پیغام میں وزیرِاعلیٰ پنجاب مریم نواز شریف نے کہاکہ پنجاب کو فوسل فیول سے نجات دلا کر صاف اور سبز توانائی کے دور میں داخل کررہے ہیں،پنجاب میں روایتی توانائی کے انفراسٹرکچر کو تبدیل کرنے کے لیے سی ایم سولر پینل پروگرام متعارف کرایا ہے-

مریم نوازشریف  نے کہاکہ سی ایم سولر پینل پروگرام شہریوں کے معاشی بوجھ کو کم اور انرجی سیکٹر میں انقلاب لاۓ گا، زرعی ٹیوب ویلز کی سولرائزیشن کے منصوبے سے کسانوں کو صاف اور سستی توانائی فراہم کی جائے کی، ٹرانسپورٹ کے شعبے میں بھی کلین انرجی متعارف کرانے کے لئے اہم اقدامات اٹھائے گئے ہیں۔

مریم نواز شریف نے مزیدکہاکہ پنجاب میں ای وہیکل رجیم متعارف کرایا جا رہا ہے تاکہ دھوئیں اور آلودگی کا خاتمہ کیا جا سکے، طلبہ کو ای بائیکس دی ہیں جو نہ صرف ماحول دوست بلکہ ایندھن کے اخراجات کو بھی کم کرتی ہیں،پنجاب نے حال ہی میں 27 الیکٹرک بسیں حاصل کی ہیں اور مزید 500 الیکٹرک بسوں کا آرڈر دے دیا ہے-

یہ بھی پڑھیں:پاکستان 2035 تک 1 ٹریلین ڈالر کی معیشت بن سکتا ہے، عالمی بینک

مریم نوازشریف نے کہاکہ حکومت پنجاب نے ملک کی پہلی جامع ماحولیاتی پالیسی متعارف کروائی ہے کلین انرجی اسکا لازمی جزو ہے،بشمول وزیرِاعلیٰ آفس پنجاب کے کئی سرکاری دفاتر کو قابل تجدید توانائی پر منتقل کر دیا گیا ہے، کلین انرجی آنے والی نسلوں کے لیے  ایک روشن اور محفوظ مستقبل کی ضمانت ہے ۔