دفعہ 144 کی خلاف ورزی کرنیوالوں سے سختی سے نمٹا جائیگا، عظمیٰ بخاری
![دفعہ 144 کی خلاف ورزی کرنیوالوں سے سختی سے نمٹا جائیگا، عظمیٰ بخاری](https://www.24urdu.com/digital_images/large/2024-07-26/news-1721977023-7809.jpg)
Stay tuned with 24 News HD Android App
![Get it on Google Play](https://play.google.com/intl/en_us/badges/static/images/badges/en_badge_web_generic.png)
(24 نیوز) صوبائی وزیر اطلاعات پنجاب عظمی بخاری نے کہا ہے کہ پنجاب میں دفعہ 144 دہشتگردی کے پیش نظر لگائی گئی ہے، جو بھی قانون کی خلاف ورزی کریگا اس سے سختی سے نمٹا جائے گا اور قانونی کاروائی کی جائے گی۔
صوبائی وزیر اطلاعات پنجاب کا کنہا ہے کہ احتجاج اور دھرنے کے نام پر شہریوں کی زندگیاں اجیرن بنانے کی ہرگز اجازت نہیں دی جائے گی، جو جماعت 2014 سے سڑکوں پر ہے تین دن گھروں میں آرام کر لے، ماضی سے لے کر اب تک تحریک انصاف کی سیاسی تاریخ سڑکیں اور چوک چوراہوں کے گرد ہی گھومتی رہی ہے، پاکستان میں انتشار افراتفری اور ہیجان کی کیفیت پیدا کرنا ہی دھرنا پارٹی کا ایجنڈا ہے اور یہ اس پارٹی کے آغاز سے ہی رہا ہے۔
عظمیٰ بخاری نے کہا ہے کہ اڈیالہ جیل میں بیٹھے قیدی کا مشن دھرنوں کے ذریعے ہی اقتدار میں پہنچنا ہے لیکن اب پہلے جیسی سہولت کاری دستیاب نہیں اورنہ ہی دھرنے کے لیے وہ فنانسر میسر ہیں، آپ لوگوں کو اڑھائی گھنٹے والی بھوک ہڑتال ہی سوٹ کرتی ہے، 3 سے 7 والی ٹائمنگ بہتر ہے۔
ان کا کہنا ہے کہ دھرنا پارٹی کے پاس احتجاج اور دھرنے کے لیے خیبر پختونخواہ موجود ہے،کچھ دن پہلے بنوں میں ہونے والے افسوسناک واقعے پر ابھی بھی قوم کے بہت سارے سوالات موجود ہیں،خیبر پختونخواہ کے عوام کی بدقسمتی ہے کہ ان پر خرچ ہونے والا پیسہ اگلے پانچ سال تک دھرنوں اور احتجاج پر خرچ ہوگا۔
عظمیٰ بخاری نے اپنے بیان میں مزید کہا ہے کہ مریم نواز پنجاب کی عوام کو سستی روٹی، سستا آٹا، مفت ادویات دے رہی ہے جبکہ خیبر پختونخواہ کی عوام 11 سال سے انقلابی تقریریں اور ریاست مخالف پروپیگنڈے سے پیٹ بھر رہی ہے۔