عمران خان اپنی شکست مان چکے، ہم تو جشن منانے جا رہے ہیں، مریم نواز

(24 نیوز)مسلم لیگ ن کی مرکزی نائب صدر مریم نواز نے کہاہے کہ عمران خان اپنی شکست مان چکے ہیں ، ہم تو اب جشن منانے جارہے ہیں ۔
مریم نواز کاکہناہے کہ اسلام آباد پہنچیں گے تو حکومت کا خاتمہ ہو چکا ہو گا،عمران خان دو، دو نشستوں والوں کی منتیں کررہے ہیں ۔ان کا کہناتھا کہ لاہور نے جواستقبال کیا ثابت کردیاکہ یہ مسلم لیگ ن کا قلعہ ہے ۔
مریم نواز نے پنجاب اسمبلی تحلیل کرنے کی خبروں پر ردعمل دیتے ہوئے کہاکہ پنجاب کو بہت بہت مبارک،پنجاب والوں کی بزدار سے جان چھوٹ رہی ہے،ان کا کہناتھا کہ عمران خان ایک دن جیل میں نہیں گزار سکے گا، اسے اتحادی چھوڑ گئے ، ایم این ایز چھوڑ گئے ۔

تفصیلات کے مطابق ملکی سیاست میں گہما گہمی عروج پر ہے اور  سیاسی پارہ ہائی نظر آرہا ہے ، حکومت اور اپوزیشن کے ملک بھر سے قافلے شہر اقتدار کی جانب رواں دواں ہیں۔ تحریک انصاف کے 27 مارچ کے جلسے میں شرکت کے لئے کراچی کینٹ اسٹیشن سے قافلہ خصوصی ٹرین کے ذریعے اسلام آباد روانہ ہوگیا ہے۔ پی ٹی آئی کا قافلہ رکن قومی اسمبلی آفتاب صدیقی اور رکن سندھ اسمبلی شہزاد قریشی کی قیادت میں روانہ ہوا۔خصوصی ٹرین کے ذریعے خواتین اور مرد پی ٹی آئی کارکنان کی بڑی تعداد روانہ ہوئی، کارکنان کے لئے خصوصی ٹرین میں 18 بوگیاں لگائی گئی ہیں۔ اسکے علاوہ پی ٹی آئی جلسہ میں شرکت کے لئے وزیراعلیٰ گلگت بلتستان خالد خورشید کی قیادت میں قافلہ اسلام آباد پہنچ گیا ہے۔میڈیا کوآرڈینیٹر وزیراعلیٰ کے مطابق وزیراعلیٰ کے ہمراہ ہزاروں لوگ جلسے میں شرکت کے لیے پہنچ چکے ہیں، وزیراعلیٰ آئی ٹین گراؤنڈ میں جلسے سے شرکاء سے خطاب کریں گے۔

 دوسری جانب مہنگائی مکاؤ مارچ کے لئے اپوزیشن کے قافلے 28 مارچ کو اسلام آباد پہنچیں گے۔ مسلم لیگ ن کے نائب صدور مریم نواز اور حمزہ شہباز کی قیادت میں مہنگائی مکاؤ لانگ مارچ کا آغاز آج ماڈل ٹاون سے ہوا۔آج رات گوجرانوالہ میں پہلا پڑاؤ ہوگا۔ شہر بھر میں لانگ مارچ کے حوالے سے بینرز لگا دیے گئے ہیں۔ شاہدرہ، اسلامپورہ، فیروزپور روڈ، ٹھوکر نیاز بیگ سمیت مختلف مقامات پر لانگ مارچ کے بینرز آویزاں ہیں۔پاکستان مسلم لیگ (ن) کی ترجمان مریم اورنگزیب نے مہنگائی مکاؤ مارچ میں بھرپور شرکت کی عوامی دعوت دی ہے۔مسلم لیگ ن کے رہنما اپنے اپنے حلقوں سے ریلیوں کی صورت میں ریلی میں شرکت کیلئے پہنچے۔ 27 مارچ کو مہنگائی مکاؤ مارچ گوجرانولہ سے اسلام آباد روانہ ہوگا۔ترجمان مسلم لیگ ن خیبر پختونخوا اختیار ولی خان کے مطابق لانگ مارچ کے لئے مسلم لیگ ن خیبر پختونخوا کا قافلہ 28 مارچ کو پشاور سے روانہ ہوگا۔لیگی رہنما حمزہ شہباز کا کہنا ہے کہ عمران خان کو بنی گالا سے اتارکر عوام کی عدالت میں پیش کریں گے۔ادھر جمعیت علماء اسلام (ف) نے حکومت کے خلاف مہنگائی مارچ کے شیڈول کا اعلان کرتے ہوئے کہا ہے کہ  تمام قافلے 26 مارچ کی شام اسلام آباد میں داخل ہوں گے اور سری نگر ہائی وے پر جمع ہوں گے۔ڈیرہ اسماعیل خان سے جے یو آئی ف کا مرکزی قافلہ اسلام آباد روانہ ہوگا۔

 دوسری جانب وفاقی دارلحکومت اسلام آباد میں امن وامان قائم رکھنے کے لئے  پنجاب سے مزید پولیس فورس اور وسائل طلب کیے گئے ہیں۔ مجموعی طور پر پنجاب پولیس کے دو ہزار افسران و جوان اسلام آباد میں امن و امان قائم رکھنے کے لیے خدمات سرانجام دیں گے۔اسلام آباد میں 27 مارچ پریڈ گراؤنڈ شکر پڑیاں میں پی ٹی آئی کے جلسے، وزیر اعظم کے خلاف تحریک عدم اعتماد، حکومت اور اپوزیشن جلسوں اور لانگ مارچ کے لیے وفاقی دارالحکومت میں اضافی نفری طلب کرلی گئی ہے۔ضلعی انتظامیہ اور پولیس کی جانب سے فول پروف سیکیورٹی و دیگر تمام انتظامات مکمل کر لئے گئے۔ سیکیورٹی انتظامات کو بہترین بنانے اور مانیٹرنگ کے نظام کو مؤثر کر نے کے لیے کنٹرول روم قائم کیا گیا ہے۔کمشنر آفس راولپنڈی میں سیاسی جما عتوں کے جلسوں و مارچ کے پیش نظر امن و امان کے سلسلے میں خصوصی کنٹرول روم قائم کرلیا گیا۔ کنٹرول روم کے ذر یعے سیاسی جماعتوں کی ریلی روٹس کی مکمل نگرانی کی جائے گی۔ڈویژن بھر میں تمام آفیسرز اور آفیشلز کی چھٹیاں منسو خ کر دی گئیں جبکہ افسران اور اسٹاف کو حاضری یقینی بنانے کی ہدایت کی گئی۔ہسپتالوں میں قبل از وقت اقدامات کے تحت ایمرجنسی نافذ جبکہ سول ڈیفنس اور ریسکیو 1122 کو ہائی الرٹ کر دیا گیا۔ آفسران کی انٹری و ایگزٹ پوائنٹس پر ڈیوٹی مقرر کر دی گئی۔

یہ بھی پڑھیں: پنجاب اسمبلی تحلیل کرنے کی سمری تیار، حکومت کی تردید