(24نیوز)پنجاب آرٹس کونسل نے عیدالفطر کے موقع پر صوبہ بھرکے تھیٹرز میں بڑھتی ہوئی فحاشی اور عریانی کے سدباب کے لیے سخت اقدامات اٹھانے کا فیصلہ کر لیا۔
ایگزیکٹو ڈائریکٹر پنجاب آرٹس کونسل محمد تنویر ماجد اور ڈائریکٹر آپریشن مغیث بن عزیز کی جانب سے تھیٹر مالکان، پروڈیوسرز اور ڈائریکٹرز کواس حوالے سے ہدایات جاری کر دی گئی ہیں کہ وہ اپنے اپنے تھیٹرز میں اخلاقی ضوابط کی مکمل پاسداری کو یقینی بنائیں۔
کلچرل رپورٹرز کے اعزاز میں دیئے گئے افطار ڈنر کے موقع پرایگزیکٹوڈائریکٹرپنجاب کونسل آف دی آرٹس(پکار)محمد تنویر ماجد نے گفتگوکرتے ہوئے کہا کہ تھیٹرز میں فحاشی اور غیر اخلاقی حرکات کسی صورت برداشت نہیں کی جائیں گی،اس مقصد کے لیے پنجاب بھر میں ای-مانیٹرنگ کے عمل کو مزید سخت کر دیا گیا ہے تاکہ تھیٹر کے ماحول کو صاف ستھرا رکھا جا سکے۔
محمد تنویر ماجد کا کہنا تھا کہ اب کسی کو بھی فحاشی کا مرتکب ہونے کا موقع نہیں دیا جائے گا، اور جو بھی اس کے خلاف جائے گا، اسے سخت قانونی کارروائی کا سامنا کرنا ہوگا۔
ایگزیکٹو ڈائریکٹر محمد تنویر ماجد نے اس موقع پر مزید کہا کہ تھیٹر کو ایک خالص تفریحی اور فیملی ماحول فراہم کرنے کے لیے یہ اقدامات ناگزیر ہیں، اور جو بھی ان ضوابط کی خلاف ورزی کرے گا، اسے کسی قسم کی رعایت نہیں دی جائے گی۔
عیدالفطر کے موقع پر پیش ہونے والے تمام تھیٹر ڈراموں کی فل ڈریس سینسر ریہرسل کی مانیٹرنگ کا بھی آغاز کر دیا گیا ہے جو عید سے قبل مکمل کر لی جائے گی،اس تمام عمل کی نگرانی ڈائریکٹر آپریشن(پکار) مغیث بن عزیز کررہے ہیں جواس بات کو یقینی بنائیں گے کہ کسی ڈرامے میں غیر اخلاقی مواد شامل نہ ہو۔
یہ بھی پڑھیں:پی ایس ایل 10 کاآفیشل ترانہ،پی سی بی نے گلوکار کا اعلان کر دیا
پنجاب آرٹس کونسل کی جانب سے تھیٹر کے ماحول کو صاف رکھنے کے لیے متعدد مرد و خواتین فنکاروں پر پابندی بھی عائد کی گئی ہے، جبکہ تمام فنکاراؤں سے بیانِ حلفی لینے کا فیصلہ کیا گیا ہے کہ وہ تھیٹرز میں فحش رقص اور نازیبا جملے بازی نہیں کریں گی۔