(24نیوز)فیس بک کی زیرملکیت موبائل ایپلیکیشن انسٹاگرام صارفین کے اکاؤنٹ ہیک ہونے کا خطرہ بڑھ گیا۔
تفصیلات کے مطابق بین الاقوامی میڈیا رپورٹ کے مطابق انسٹاگرام کے ہزاروں صارفین کو رواں ہفتے پاسورڈ تبدیل ہونے کا ٹیکسٹ میسج وصول ہوا۔ٹیکنالوجی پر نظر رکھنے والے ماہرین کا کہنا ہے کہ کوئی گروپ صارفین کے اکاؤنٹس ہیک کرنے کی کوشش کررہا ہے۔
یہ بات بھی سامنے آئی کہ جن صارفین نے اُس میسج پر عمل کیا تو وہ اپنے اکاؤنٹس سے ہاتھ دھو بیٹھے۔صارفین کا کہنا ہے کہ ٹیکسٹ میسجز کے ذریعے فراڈ کر کے آئی ڈیز ہیک کرنے کی کوشش کی جارہی ہے۔
ٹیکنالوجی پر نظر رکھنے والے ماہرین نے صارفین کو مشورہ دیا کہ اگر اُن کے پاس پاسورڈ تبدیلی کا کوئی پیغام آئے تو وہ فوراً اپنے اکاؤنٹ تک رسائی حاصل کریں اور جتنی جلدی ممکن ہو پاسورڈ تبدیل کر کے اسے کچھ گھنٹوں کے لئے پرائیوٹ کردیں۔انسٹاگرام کی جانب سے ابھی تک اس حوالے سے کوئی وضاحت جاری نہیں کی گئی۔
چند صارفین کا مانناہے کہ انسٹاگرام کی جانب سے ہونے والی تبدیلی کا فائدہ ہیکرز نے اٹھایا اور انہوں نے سینکڑوں صارفین کے اکاؤنٹس تک رسائی حاصل کی۔
یاد رہے کہ انسٹاگرام کی جانب سے پاسورڈ کی تبدیلی کا میسج نہیں بلکہ ای میل بھیجی جاتی ہے۔