اسرائیلی بربریت کے حامی امریکا کو سلامتی کونسل میں ہزیمت کا سامنا

(ویب ڈیسک) سلامتی کونسل میں حماس کیخلاف اور اسرائیلی حمایت میں پیش کی گئی امریکی قرارداد کو روس اور چین نے ویٹو کر دیا۔

غیر ملکی میڈیا رپورٹس کے مطابق امریکا کی جانب سے سلامتی کونسل میں پیش کی گئی قرارداد میں 7 اکتوبر کو حماس کی اسرائیل میں کارروائی کی مذمت کی گئی اور ساتھ ہی غزہ پر اسرائیل فضائی حملوں کو اس کا دفاعی حق قرار دیتے ہوئے اسرائیل کی حمایت کی گئی تھی۔

روس اور چین نے اقوام متحدہ کی سلامتی کونسل میں غزہ کے حالیہ واقعات سے متعلق امریکی قرارداد کو روکنے کیلئے اپنی ویٹو پاور استعمال کی اور اسے کامیاب ہونے سے روک دیا، متحدہ عرب امارات نے بھی امریکی قرارداد کیخلاف ووٹ دیا، 10 ارکان قرارداد کے حق میں کھڑے ہو گئے۔

روس کی جانب سے قرارداد کیخلاف موقف اپنایا گیا ہے کہ اسرائیل کو امریکی قرارداد میں فلسطینیوں کو ذبح کرنے کی چھوٹ دی گئی ہے، اسرائیل کو دفاع کے نام پر فلسطینیوں کے قتل کی اجازت نہیں دی جا سکتی۔

سلامتی کونسل میں چینی مندوب نے قرار دیتے ہوئے کہا کہ امریکی قرارداد کا مسودہ فلسطین پر دیرینہ قبضے کو تسلیم کرنے میں ناکام رہا، غزہ میں جنگ بندی انسانی بنیادوں پر ہونی چاہیے، چین غزہ کی صورتحال کو حل کرنے کیلئے روس کی حمایت کرتا ہے۔

مزید پڑھیں:  زمینی تنازع: سگے بھائی پر کئی بارٹریکٹر چڑھا کر مار ڈالنے کی ویڈیو وائرل

واضح رہے کہ اسرائیل کی جانب سے نہتے فلسطینیوں پر بمباری جاری ہے، تازہ حملے میں 344 بچوں سمیت مزید 756 شہری شہید ہو گئے ہیں جس کے بعد شہداء کی مجموعی تعداد ساڑھے 6 ہزار سے زائد ہو گئی ہے جن میں 27 سو بچے، 13 سو خواتین شامل ہیں۔