(ویب ڈیسک) زندہ دلان لاہور نے اپنے شہر میں پی ایس ایل 8 کے پہلے میچ کے دوران ’ہاؤس فل‘ کر دیا، پُرجوش شائقین نے ہر اسٹروک اور وکٹ پر کھل کر داد دی، اس موقع پر سیکیورٹی کے سخت انتظامات دیکھنے میں آئے۔
تفصیلات کے مطابق قذافی اسٹیڈیم لاہور میں پی ایس ایل کرکٹ کا میچ دیکھنے کیلئے شائقین کی بڑی تعداد پہنچی، تماشائیوں کی آمد کا سلسلہ 3 گھنٹے قبل ہی شروع ہوگیا تھا جس میں بتدریج اضافہ ہوتا گیا۔
میچ کے 5 اوورز مکمل ہونے تک ہی ہاؤس فل ہوچکا تھا، راستے میں جھنڈے خریدنے اور چہرے پر قومی اور فیورٹ ٹیموں کے پرچم پینٹ کروانے کا سلسلہ بھی جاری رہا، پرجوش تماشائیوں نے میچ سے اتوار کی چھٹی کا لطف دوبالا کیا۔
یہ بھی پڑھیے: پی ایس ایل 8, قلندرز نے نئی تاریخ رقم کردی
ایک ایک اسٹروک اور وکٹ پر دل کھول کر داد دی جاتی رہی، موبائل ٹارچ کی روشنیوں سے بھی خوبصورت منظر بنایا گیا، باؤنڈری کے قریب آنے والے کرکٹرز کو مخاطب کرکے نعرے بھی لگائے جاتے رہے۔
ان فارم بیٹر فخر زمان انجری کا شکار ہوئے تو اسٹینڈز میں مایوسی پھیل گئی، اس دوران پشاور زلمی کے کھلاڑی خوش گپیوں میں مصروف رہے، طبی امداد ملنے پر فخر زمان کریز پر واپس آئے تو خوب شور مچایا گیا، وہاب ریاض کی گیندوں پر اسٹروک لگنے پر ’منسٹر کی پٹائی نہ کر بھائی‘ کی آوازیں لگائی گئیں۔
میچ کے دوران سخت حفاظتی انتظامات دیکھنے میں آئے، رینجرز اور پولیس سمیت سیکیورٹی اداروں کے اہلکار اپنی ڈیوٹیز پر مستعد رہے، 3 مقامات پر جامہ تلاشی کے بعد واک تھرو گیٹ سے گزرنے سے قبل ٹکٹ اسکین کیے جاتے، شناختی کارڈز بھی چیک کیے گئے۔