نیوزی لینڈ کیخلاف میچ سے قبل بھارتی کپتان روہت شرما ان فٹ

(24 نیوز)آئی سی سی چیمپئنز ٹرافی 2025 میں نیوزی لینڈ کے خلاف سے میچ سے قبل بھارتی ٹیم کے  کپتان روہت شرما کے انجرڈ ہونے کے حوالے سے بری خبریں سامنے آرہی ہیں۔

بھارتی میڈیا کے مطابق بھارتی کرکٹ ٹیم کے کپتان روہت شرما نے نیوزی لینڈ کے خلاف چیمپئنز ٹرافی 2025 کے میچ سے قبل نیٹ پریکٹس میں حصہ نہیں لیا، جس سے ان کی فٹنس کے بارے میں تشویش پیدا ہوگئی ہے۔

پاکستان کے خلاف میچ میں روہت شرما کو ہیمسٹرنگ میں تکلیف محسوس ہوئی تھی لیکن میچ کے بعد انہوں نے کہا تھا کہ وہ ٹھیک ہیں اور فکر کی کوئی بات نہیں۔

مزید پڑھیں:رکی پونٹنگ نے پاکستان کی شکست کا ذمہ دار 2 کھلاڑیوں کو قرار دے دیا

بھارتی میڈیا کی تازہ رپورٹس کے مطابق کپتان روہت شرما نے پریکٹس سیشن کے دوران سخت جسمانی سرگرمیوں سے گریز کیا اور صرف ہلکی دوڑ اور شیڈو بیٹنگ کی، یہ احتیاطی تدابیر اس لیے اختیار کی گئیں تاکہ ان کی چوٹ مزید نہ بڑھے اور وہ نیوزی لینڈ کے خلاف میچ کے لیے مکمل طور پر فٹ رہیں۔

ٹیم مینجمنٹ اور میڈیکل سٹاف روہت شرما کی فٹنس پر گہری نظر رکھے ہوئے ہے اور ان کی شرکت کا حتمی فیصلہ میچ سے قبل ان کی حالت کے جائزے کے بعد کیا جائے گا۔

 شائقین اور ٹیم یہ امید کر رہے ہیں کہ روہت شرما جلد صحت یاب ہو کر میدان میں واپس آئیں گے اور اپنی قائدانہ صلاحیتوں سے ٹیم کو کامیابی کی راہ پر گامزن کریں گے۔

واضح رہے کہ چیمپئنز ٹرافی 2025 کے لیے بھارت اور نیوزی لینڈ کا ٹاکرا 2 مارچ کو دبئی میں ہو گا جبکہ پہلے ہی دونوں ٹیمیں سیمی فائنل کے لیے کوالیفائی کرچکی ہیں۔