(راو دلشاد )وزیراعلیٰ پنجاب مریم نواز نے پنجاب میں پانچ سالہ ٹرانسپورٹ پروگرام کی منظوری دیدی، پنجاب میں جدید ترین آٹو میٹڈ ریپڈ ٹرانسپورٹ سسٹم متعارف کرانے کا فیصلہ کیا گیا ہے۔
وزیراعلیٰ مریم نوازشریف کی زیر صدارت ٹرانسپورٹ سے متعلق خصوصی ویڈیو لنک اجلاس وزیراعلیٰ مریم نواز شریف نے اے آر ٹی کے فوری ٹرائل رن کا حکم دے دیا، آٹو میٹڈ ریپڈ ٹرانسپورٹ سسٹم ملائیشیا، ابوظہبی اور قطر سمیت دنیا بھر میں ماس ٹرانزٹ کا کامیاب سسٹم ہے۔
مریم نواز کو بریفنگ میں بتایا گیا کہ عام بس کی نسبت اے آر ٹی کے لئے روڈ پر کم جگہ درکارہوگی، اے آرٹی تین کوچز پر مشتمل بس میں 300 سے زائد مسافروں کی گنجائش ہوگی۔
اے آر ٹی سمارٹ اسٹیشن پر بس کھڑے کھڑے چند منٹ میں چارج ہو جائے گی۔اے آر ٹی میں مسافروں کے لئے فارسٹ چارجنگ، وائی، مانیٹرنگ کیمرہ اور دیگر سہولیات میسر ہونگی۔
اے آر ٹی روایتی فیول کی بجائے مکمل سولرائزڈ ٹرانسپورٹ سسٹم ہوگا، پہلے مرحلے میں لاہور، فیصل آباد اور گوجرانوالہ سمیت دیگر شہروں میں اے آر ٹی ٹرانسپورٹ سسٹم متعارف کرایا جائے گا۔
تین مراحل میں دس دس شہروں میں نیا ٹرانسپورٹ سسٹم متعارف کرایا جائے گا، آٹو میٹڈ ریپڈ ٹرانسپورٹ سسٹم کے ساتھ ہر شہر میں فیڈر بسیں بھی چلائی جائیں گی۔
اس موقع پر وزیراعلیٰ پنجاب مریم نواز نے کہا کہ آٹو میٹڈ ریپڈ ٹرانسپورٹ پنجاب بھر میں چار سال میں مکمل کرنا چاہتے ہیں، جدت کا ٹیچ دینے کے لئے ہر شہر میں نیا ٹرانسپورٹ سسٹم ضروری ہے، ہر شہر میں ”اینڈ ٹو اینڈ“سسٹم متعارف کرانے چاہتے ہیں۔
مریم نواز نے کہا کہ آٹو میٹڈ ریپڈ ٹرانسپورٹ سسٹم چھوٹے شہر میں رہنے والوں کا بھی حق ہے محرومیاں دور کرنا چاہتے ہیں، جدید ٹرانسپورٹ سسٹم سے لوگوں کے معیار زندگی میں بہتری آئے گی۔