سابق بھارتی کرکٹر نے پاکستانی ٹیم کی کوچنگ کی پیشکش کر دی

(24 نیوز)سابق بھارتی کرکٹر یوگراج سنگھ نے پاکستانی کرکٹ ٹیم کی کوچنگ کی پیشکش کرتے ہوئے کہا ہے کہ ایک سال کے اندر ٹیم کھڑی کر کے دکھاوں گا۔

سابق بھارتی کرکٹر اور اداکار یوگراج سنگھ نے پاکستان کرکٹ ٹیم کو کوچنگ کی پیشکش ایسے وقت کی ہے جب چیمپئنز ٹرافی کا میزبان پاکستان گروپ مرحلے سے ہی ایونٹ سے باہر ہو چکا ہے۔

بھارتی میڈیا کے مطابق ایک بیان میں یوگراج سنگھ جوکہ اپنی کرکٹ اکیڈمی بھی چلا رہے ہیں نے پاکستان ٹیم پر تنقید کرنے والے سابق پاکستانی کرکٹرز کو بھی نشانہ بنایا۔

یوگراج سنگھ کا کہنا تھا کہ انہیں اپنی ٹیم کے بارے سخت الفاظ استعمال کرتے ہوئے شرم آنی چاہئے، یوگراج سنگھ نےکہا کہ مجھے کوچنگ کے لیے ٹیم دیں میں ایک سال میں ٹیم کھڑی کر کے دکھاؤں گا، تم سب یاد رکھو گے۔

سابق بھارتی کرکٹر کا کہنا تھا کہ سب جذبے کی بات ہے، میں یہاں اکیڈمی میں روز 12 گھنٹے دیتا ہوں، بڑے بڑے دعوےکرنا بہت آسان ہے، آپ کو اپنے ملک کے لیے خون پسینہ دینا پڑتا ہے۔

یوگراج سنگھ کا کہنا تھا کہ وسیم اکرم کو چاہئے کہ وہ کمنٹری چھوڑ کر اپنے ملک جائیں اور ان کھلاڑیوں کے لیے کیمپ لگائیں، میں دیکھنا چاہتا ہوں کہ کتنے لوگ (سابق پاکستانی کھلاڑی) پاکستان ٹیم کی مدد کرنا چاہتے ہیں تاکہ وہ ورلڈکپ جیت سکے، اگر نہ ہو تو استعفیٰ دے دیں۔

انھوں نے کہا کہ وسیم اکرم، وقار یونس اور شعیب اختر  ٹیلنٹ کے بارے میں بات کر رہے ہیں، پاکستان ٹیلنٹ سے بھرا پڑا ہے، آپ لوگوں کو بھی کسی نے شناخت کیا تھا اور کسی کی مدد سے آپ لوگ اچھے کرکٹر بنے، مجھے بالکل پسند نہیں کہ کسی بھی ملک کا کوئی بھی شخص اپنے کھلاڑیوں کے بارے میں ایسی باتیں کرے۔

خیال رہے کہ یوگراج سنگھ نے 81-1980 میں آسٹریلیا اور نیوزی لینڈ کے دورے کے دوران بھارت کے لیے ایک ٹیسٹ اور 6 ون ڈے انٹرنیشنل میچز کھیل رکھے ہیں۔