(24نیوز) کوٹری جامشورو انڈس ہائی وے پر شاہ بریو کے قریب مسافر کوچ کی کار کو ٹکر کے نتیجے میں 3 افراد جاں بحق ہوگئے۔مرنے والے افراد کی شناخت 24 سالہ شیراز تنیو ، 34 سالہ عامر تنیو اور 40 سالہ عبدالرشید سے ہوئی۔
تفصیلات کے مطابق کوٹری میں جامشورو انڈس ہائی وے پر شاہ بریو کے قریب مسافر کوچ نے کار کو ٹکر مار دی، حادثے کے نتیجے میں 3 افراد جاں بحق اور ایک زخمی ہوگیا۔پولیس حکام کے مطابق حادثہ اس قدر شدید تھا کہ ٹکر کے بعد کار الٹ کر گہری کھائی میں جا گری اور 3 افراد موقع پر ہی دم توڑ گئے۔
ذرائع کے مطابق کار سوار افراد کراچی سےلاڑکانہ جارہے تھے۔پولیس کا کہنا ہے کہ حادثہ دھند کے باعث پیش آیا،مسافر کوچ کا ڈرائیور کار کو ٹکر مار کر کوچ سمیت موقع سے فرار ہوگیا، تاہم کوچ کی تلاش جاری ہے۔