آج کہاں کہاں بادل برسیں گے ؟ محکمہ موسمیات نے پیش گوئی کردی 

(24نیوز)محکمہ موسمیات نے ملک کے مختلف علاقوں میں موسلادھار بارش اورپہاڑوں پربرف باری کی  پیشگوئی کردی ۔

محکمہ موسمیات کے مطابق بالائی خیبرپختونخوا، گلگت بلتستان اور کشمیر میں بیشتر مقامات جبکہ بالائی پنجاب، اسلام آباد اور زیریں خیبر پختونخوا میں چند مقامات پر وقفے وقفے سے تیز ہواؤں اور گرج چمک کے ساتھ بارش اورپہاڑوں پربرف باری کا امکان ہے،اس دوران بالائی خیبر پختونخوا، گلگت بلتستان اور کشمیر میں بھی چند مقامات پر موسلادھار بارش اور ژالہ باری کا امکان ہے۔

محکمہ موسمیات کے مطابق آج اسلام آباد اور گرد و نواح میں مطلع جزوی ابرآلود رہنے کے علاوہ تیز ہواؤں اورگرج چمک کے ساتھ بارش کا امکان ہے۔مری، گلیات، راولپنڈی، اٹک، چکوال، جہلم، حافظ آباد، گوجرانوالہ، منڈی بہاؤالدین، گجرات، سیالکوٹ، نارووال، لاہور، شیخوپورہ، میانوالی، خوشاب، سرگودھا اور گرد و نواح میں چند مقامات پر تیز ہواؤں اور گرج چمک کے ساتھ بارش کی توقع ہے۔

سندھ اور بلوچستان کے بیشتر اضلاع میں موسم خشک اور مطلع جزوی ابرآلود رہنے کی توقع ہے،تاہم کوئٹہ، زیارت، ژوب، موسیٰ خیل اور چمن میں چند مقامات پر تیز ہواؤں اور گرج چمک کے ساتھ بارش کا امکان ہے۔

ہری پور، بونیر، چترال، دیر، سوات، شانگلہ، کوہستان، بٹگرام، مانسہرہ، ایبٹ آباد، باجوڑ، مہمند، خیبر، اورَکزئی، کرم میں اکثر مقامات پر جبکہ پشاور، چارسدہ، نوشہرہ، صوابی، وزیرستان، کوہاٹ، کرک، لکی مروت، بنوں اور ڈی آئی خان میں چند مقامات پر آندھی اور گرج چمک کے ساتھ بارش اور پہاڑوں پر برفباری ہوسکتی ہے۔

یہ بھی پڑھیں:پاکستان سٹاک ایکسچینج میں کاروبار کا مثبت رجحان،ڈالربھی سستا ہو گیا

محکمہ موسمیات کے مطابق کشمیر اور گلگت بلتستان میں تیز ہواؤں اور گرج چمک کے ساتھ وقفے وقفے سے بارش اور پہاڑوں پر برفباری کی توقع ہے۔