سوناکشی فلم سائن کرنے کی اجازت شوہرسے لیتی ہیں؟

(ویب ڈیسک)بالی ووڈ کی معروف اداکارہ سوناکشی سنہا نے حال ہی میں اپنے شوہر ظہیر اقبال کے ساتھ اپنے تعلقات اور پیشہ ورانہ زندگی کے حوالے سے اہم انکشافات کیے ہیں۔

سوناکشی کا کہنا ہے کہ وہ اپنے ہر کام کے لیے شوہر سے مشورہ ضرور کرتی ہیں۔ انہوں نے کہا کہ ہمارا کام ہماری زندگی کا اہم حصہ ہے اور ہم گھر میں اس کے بارے میں کھل کر بات کرتے ہیں۔ ‘مجھے ان کی رائے سننا پسند ہے اور وہ بھی میری رائے کو قدر کی نگاہ سے دیکھتے ہیں۔‘

 سوناکشی نے مزید بتایا کہ وہ اپنی سکرپٹس اور کام سے متعلق تمام معلومات سب سے پہلے اپنے شوہر ظہیر کو بتاتی ہیں۔اداکارہ نے مزید کہا، ‘ہمارے درمیان ہمیشہ کھلی اور سچی بات چیت ہوتی ہے، اور ظہیر ہمیشہ میری حوصلہ افزائی کرتے ہیں۔‘

سوناکشی نے اپنے اور ظہیر کے تعلقات کے آغاز کے حوالے سے بتایا کہ جب وہ ایک دوسرے کو ڈیٹ کر رہے تھے تو کھل کر جذبات کا اظہار کرتے تھے اور جلد ہی بہترین دوست بن گئے تھے۔انہوں نے مزید انکشاف کیا کہ ڈیٹنگ کے صرف ایک ماہ کے اندر ہی انہوں نے یہ فیصلہ کر لیا تھا کہ وہ ظہیر سے شادی کرنا چاہتی ہیں۔

اداکارہ نے اپنی شادی کا اعلان کرتے ہوئے انسٹاگرام پر ایک جذباتی پوسٹ شیئر کی تھی جس میں انہوں نے لکھا، ‘آج سے سات سال پہلے، یعنی 23 جون 2017 کو ہم نے ایک دوسرے کی آنکھوں میں محبت کی خالص ترین جھلک دیکھی اور اسے ہمیشہ قائم رکھنے کا عہد کیا۔ آج یہ محبت ہماری زندگی کے ہر چیلنج اور کامیابی میں ہماری رہنمائی کر رہی ہے۔‘ 
شادی کی سالگرہ کے قریب، سوناکشی نے یہ بھی اعتراف کیا کہ شوہر کا ساتھ زندگی کو بہت آسان بناتا ہے، خاص طور پر جب دونوں ایک ہی پیشے سے وابستہ ہوں۔

 ان کے مطابق، ایک ہی شعبے میں کام کرنے والے ساتھی کے ساتھ زندگی گزارنا انتہائی سہولت بخش ہوتا ہے۔

سوناکشی سنہا کو آخری بار فلم ‘کاکوڑا‘ میں رتیش دیش مکھ اور ثاقب سلیم کے ساتھ دیکھا گیا تھا، جس کا پریمیئر ZEE5 پر ہوا تھا۔

 اب وہ جلد ہی فلم ‘نکیتا رائے اینڈ دی بک آف ڈارکنیس‘ میں پریش راول اور سہیل نیر کے ساتھ جلوہ گر ہوں گی۔