’بلاول بھٹو کا عالمی وقار دیکھ کر عمران خان تڑپ رہے ہیں‘

(24 نیوز)وفاقی وزیر شازیہ مری کا کہنا ہے کہ وزیر خارجہ بلاول بھٹو زرداری کا عالمی وقار دیکھ کر عمران خان تڑپ رہے ہیں۔ دنیا بھر کے سفیروں کی پاکستان کے سیلاب سے متاثرہ علاقوں میں آمد وزیر خارجہ بلاول بھٹو زرداری کی بڑی سفارتی کامیابی ہے۔

شازیہ مری نے کہا کہ وزیراعظم شہباز شریف اپنے لیئے نہیں بارش اور سیلاب متاثرین کیلئے مدد مانگ رہے ہیں جبکہ عمران خان نے بطور وزیراعظم اپنے کاروباری اداروں کیلئے بھیک مانگی۔ عمران نیازی کی سیاست گالی اور الزام تراشی کے دائرے میں محدود ہے۔ بارش اور سیلاب کی تباہی پر دشمن نے بھی ہمدردی کا اظہار کیا مگر عمران خان کا کردار شرم ناک رہا۔ شازیہ مری نے کہا کہ عمران خان کی کوشش رہی کہ دنیا پاکستان کی مدد نہ کرے اور اس کے لئے جعلی سوشل میڈیا اکاونٹس سے حکومت پاکستان کے خؒاف سازش بھی کی گئی۔ اللہ کی ذات پر یقین ہے مشکل حالات سے نکل کر عوام کے سامنے سرخرو ہوں گے۔

شازیہ مری نے کہا کہ بینظیر انکم سپورٹ پروگرام صدر آصف علی زرداری کا غریبوں کیلئے بڑا تحفہ ہے جس سے بارش اور سیلاب متاثرین کو بروقت ریلیف ملا۔