(24نیوز )وفاقی دارالحکومت اسلا م آباد میں قائم قائد اعظم یونیورسٹی میں پختون سٹوڈنٹس اور بلوچ سٹوڈنٹس کے درمیان لڑائی کے باعث تمام ہاسٹلز اور یونیورسٹی خالی کرانے کیلئے پولیس کا آپریشن جاری ہے ۔
تفصیلات کے مطابق سیکرٹریٹ پولیس اور ایف سی کا قائد اعظم یونیورسٹی میں سرچ آپریشن جاری ہے ، سیکرٹریٹ مجسٹریٹ غلام مرتضی چانڈیو بھی موقع پر موجود ہیں،
اسلام آباد انتظامیہ کی جانب سے قائد اعظم یونیورسٹی کے طلبہ کو یونیورسٹی خالی کرنے کی اپیل جا رہی ہے ۔
اطلاعات کے مطابق طلباء ہاسٹلز خالی کرنے سے انکاری ہیں جبکہ پولیس اور ایف سی کی جانب سے یونیورسٹی میں مبینہ لاٹھی چارج کیا گیا ہے ۔
واضح رہے کہ گزشتہ کچھ روز قبل یونیورسٹی میں لسانیت کی بنیاد پر دو طلبا تنظیموں کے درمیان خونی تصادم سامنے آیا تھا جس کے بعد انتظامیہ نے رینجرز بھی تعینات کرنے کی درخواست کی تھی ۔