کیپٹن امریکا کی نئی فلم کی نمائش کے دوران سینما کی چھت گرگئی

(ویب ڈیسک) کیپٹن امریکا کی نئی فلم ’’بریو نیو ورلڈ‘‘ کی نمائش کے دوران سینما کی چھت گرگئی۔

بین الاقوامی خبر رساں ادارے این بی سی نیوز کے مطابق ایک جوڑا لبرٹی سنیما میں"کیپٹن امریکا" کی نئی فلم سے محظوظ ہورہاتھا کہ اچانک سنیما کی چھت ان کے سروں پر گرگئی۔

اطلاعات کے مطابق ویناچی فائر ڈپارٹمنٹ کو تقریباً 8 بجے کال موصول ہوئی، جس پر عملے نے پہنچ کر دیکھا کہ سنیما ہال میں صرف دو افراد موجود تھے،خوش قسمتی سے کوئی زخمی نہیں ہوا۔ فائر فائٹرز کی جانب سے جاری کی گئی تصاویر میں دیکھا جاسکتا ہے کہ فلم اسکرین پر چل رہی تھی، لیکن سنیما ہال کے سامنے والے حصے پر چھت کے ٹکڑے اور لکڑی کے تختے بکھرے ہوئے تھے۔ ایک ویڈیو میں دیکھا جاسکتا ہے کہ لمبے لکڑی کے تختے چھت کے شگاف سے باہر نکلے ہوئے ہیں۔

ویناچی کے لبرٹی سینما کے مالک سن بیسن تھیٹرز نے اس واقعے کو ’’غیر متوقع‘‘ قرار دیا ہے۔

 ترجمان برائن کک کے مطابق ہم سب اس بات پر شکر گزار ہیں کہ اس واقعے میں کوئی زخمی نہیں ہوا، سنیما کی ٹیم مقامی حکام کے ساتھ مل کر مکمل تحقیقات کر رہی ہے۔

یہ بھی پڑھیں:نئی پاکستانی فلم"لمبی جدائی" کے ٹریلر اور میوزک کی رونمائی

ویناچی ویلی فائر ڈپارٹمنٹ کے بیٹالین چیف کیم فلپس کے مطابق چھت گرنے سے پہلے سنیما ہال میں صرف ایک جوڑا موجود تھا،انہوں نے کچھ پھٹنے اور ٹوٹنے کی آوازیں سنیں جس پر مرد نے کھڑے ہوکر صورتحال کا ادراک کیا اور وہاں سے اپنی ساتھی کو ہٹنے کےلیے کہا۔