فضل الرحمن کی مولانا حامد الحق کی شہادت، دارالعلوم حقانیہ میں دھماکے کی شدید مذمت

(عثمان خان)جے یو آئی سربراہ مولانا فضل الرحمان کی جانب سے مولانا حامد الحق کی شہادت سمیت دارالعلوم حقانیہ پر دھماکے کی شدید مذمت کی گئی ہے۔

مولانا فضل الرحمان نے مدینہ منورہ سے مولانا حامدالحق کے چچازاد بھائی حافظ سلمان الحق سے رابطہ کیا، تعزیت کی اور واقعے کی تفصیلات معلوم کی۔

اس موقع پر انھوں نے کہا کہ مادر علمی دارالعلوم حقانیہ پر حملے اور برادرم مولانا حامد الحق سمیت شہداء اور زخمیوں کی خبر سے دل رنجیدہ اور زخمی ہے۔

انھوں نے کہا کہ دارلعلوم حقانیہ اور مولانا حامد الحق پر حملہ میرے گھر اور مدرسے پر حملہ ہے ، ظالموں نے انسانیت ،مسجد ،مدرسے ،جمعے کے مبارک دن اور ماہ رمضان کی آمد کی حرمت کو پامال کیا۔

فضل الرحمن نے کہا کہ دہشت گردی اور بدامنی معاشرے کے لئے ناسور بن چکی ہے، قانون نافذ کرنے والے اداروں کی کارکردگی سوالیہ نشان ہے۔

ان کا کہنا تھا کہ انسانیت کی جان ،مال ،عزت اور آبرو محفوظ نہیں، کے پی میں بدامنی بارے عرصے سے رونا رو رہے ہیں لیکن ریاست خاموش تماشائی بنی ہوئی ہے۔

فضل الرحمن کا کہنا تھا کہ مولانا عبدالحق رحمہ اللہ کے خانوادے کی طرح میں خود کو بھی تعزیت کا مستحق سمجھتا ہوں، اللہ کریم مولانا حامد الحق اور دیگر کی شہادت قبول فرمائے، اللہ کریم زخمیوں کو جلد صحت دے۔