(ویب ڈیسک )بالی ووڈ کے بادشاہ شاہ رخ خان کی فلم پٹھان کو جہاں ایک طرف مداحوں سے لے کر ناقدرین تک ہر جانب سے محبت مل رہی ہے وہیں دوسری جانب بالی ووڈ شخصیات بھی اس کے سحر میں گرفتار دکھائی دے رہی ہیں۔
تفصیلات کے مطابق فلم پٹھان پر بھارتی اداکاروں روینہ ٹنڈن، راج کمار راؤ، سایانی گپتا، ارجن کپور سمیت دیگر اہم شخصیات نے بھی اپنے جائزے اور تاثرات شئیر کئے ہیں۔معروف اداکارہ روینہ ٹنڈن نے اس پر ٹوئٹ کیا اور شاہ رخ خان، دیپیکا پڈوکون اور جان ابراہم کو ٹیگ کرتے ہوئے تعریفی کلمات کہے۔ انہوں نے لکھا ’’او ایم جی، اڑا دیا! ’’لاجواب۔
ہدایت کار کو ٹیگ کرتے ہوئے انہوں نے لکھا، انڈسٹری کیلئے دوبارہ جشن منانے کی وجہ بننے کا شکریہ۔اداکارہ سایانی گپتا نے بھی ٹوئٹر پیغام میں فلم پٹھان کی تعریف کی۔
سایانی نے لکھا پٹھان کے درمیانی وقفہ کے دوران قہقہے، ہنسی یہاں تک کہ رونا بھی۔ آنکھوں نے کچھ عرصے سے ایسا محسوس نہیں کیا ہے۔
ہدایت کار راہول ڈھولکیا نے اپنے ٹوئٹر پیغام میں کہا کہ 6 سال پہلے اسی دن رئیس ریلیز ہوئی تھی اور آج پٹھان فلم کا ہاؤس فل شو دیکھنا ایک ناقابل یقین تجربہ تھا۔
نوجوان اداکار راج کمار راؤ نے انسٹاگرام اسٹوری میں لکھا کہ ’’جاکر پٹھان دیکھیں اور سنیما گھروں میں سیٹیاں بجانے اور چیخنے چلانے کا جنون بھی۔ اپنے سپر اسٹار کو ایسے دیوانہ وار ایکشن سیکوینس کرتے ہوئے دیکھنے سے بہت اچھا محسوس ہوتا ہے۔لکھا سر ہم آپ کو یاد کرتے تھے اور آپ کو سلام ہے، آپ جیسا کوئی نہیں ہے۔ارجن کپور نے سدھارتھ آنند کی ہدایت کاری کی تعریف کی اور لکھا ’’کیا ہی بہترین تجربہ ہے، پٹھان صرف ایک فلم نہیں بلکہ جذبہ ہے، پوری ٹیم کو ایسی فلم بنانے پر مبارکباد جو بار بار دیکھی جائے گی۔
ان کے علاوہ ملائیکہ اروڑا نے بھی شاہ رخ پر محبت نچھاور کی۔
انسٹاگرام اسٹوری میں لکھا میں تھی، میں ہوں اور ہمیشہ شاہ رخ خان کی مداح رہوں گی، یاد نہیں کہ میں آخری بار کب فلم دیکھنے کیلئے اتنی پرجوش تھی، یہ ایک شاندار فلم ہے۔
دیا مرزا نے بھی پٹھان کی حمایت میں لکھا محبت جیت گئی، کیا ہی زبردست دھماکا ہے۔فرح خان نے بھی فلم کو بلاک بسٹر قرار دیا۔
پٹھان کنگ خان کی چار سال بعد بڑی اسکرین پر شاندار واپسی کی علامت ہے۔واضح رہے کہ 25 جنوری کو ریلیز ہونے والی ایکشن سے بھرپور فلم ’پٹھان‘میں شاہ رخ خان، جان ابراہم اور دیپیکا پڈوکون شامل ہیں۔
یہ بھی پڑھیں:فلم ’پٹھان‘ کا2 روز میں ریکارڈ بزنس لیکن جعلی ریویوز کا بازار گرم
فلم ریکارڈ توڑ شروعات کرچکی ہے اور توقع کی جارہی ہے کہ باکس آفس پر اس کی کامیابیوں کا سلسلہ جاری رہے گا۔