شہر قائد میں درندوں کا راج۔۔ 24گھنٹوں میں ایک اور کم سن بچی لاپتہ

  (24نیوز) چوبیس گھنٹوں کے دوران کراچی کے علاقے کورنگی سے دوسری بچی کو اغوا کرلیا گیا ہے۔تفصیلات کے مطابق واقعہ کورنگی ساڑھے پانچ نمبر میں پیش آیا، گمشدہ بچی کی والدہ نے بتایا کہ بچی کی عمر نو سال ہے، بچی کھیلتے کھیلتے گھر سے باہر چلی گئی تھی، رات سے تلاش جاری ہے ابھی تک کوئی سراغ نہیں مل سکا ہے۔
دوسری جانب پولیس نے بھی بچی کی گمشدگی کی تصدیق کرتے ہوئے بتایا کہ کورنگی سے ایک اور بچی کے لاپتہ ہونےکی شکایت ملی ہے، والدین سے رابطہ کرکے تحقیقات کررہے ہیں، پولیس ٹیم والدین کیساتھ گھر روانہ کردی ہے۔پولیس کا کہنا ہے کہ لاپتہ دوسری بچی کی ایف آئی آر درج کرلی گئی ہے، تحقیقات کاعمل جاری ہے،بچی کو تلاش کررہے ہیں۔
 واضح رہے کہ  قبل ازیں کراچی کے علاقے کورنگی میں واقع غوث پاک کالونی سے گزشتہ شب لاپتہ ہونے والی 6 سال کی بچی ماہم کی تشدد زدہ لاش کچرا کنڈی سے ملی تھی۔ پوسٹ مارٹم میں ماہم سے زیادتی کی تصدیق کرتے ہوئے کہا گیا ہے کہ قتل کے دوران بچی کی گردن کی ہڈی بھی توڑ دی گئی۔تفصیلات کے مطابق کراچی کے علاقے کورنگی سے ملنے والی 6 سالہ ماہم کا پوسٹ مارٹم مکمل کرلیا ، جس میں لیڈی ایم ایل او ڈاکٹر ثمیہ نے بچی ماہم سے زیادتی کی تصدیق کرتے ہوئے کہا کہ بچی سے پہلے زیادتی کی گئی اس کے بعد قتل کیا گیا۔ایم ایل او نے ابتدائی رپورٹ اور ویڈیو بیان میں انکشاف کیا ہے کہ ماہم کوناک اور منہ بند کرکے قتل کیا گیا اور قتل کے دوران ہی زور لگانے سے گردن کی ہڈی ٹوٹی۔
لیڈی ایم ایل او کا کہنا تھا کہ زیادتی کے دوران اسے بدترین تشدد کا نشانہ بھی بنایا گیا، ڈی این اے سمیت دیگر تمام نمونے حاصل کرلئے ہیں، رپورٹ آنے کے بعد واضح ہوگا کہ کتنے افراد نے زیادتی کی، ہم نے اپنی ابتدائی رپورٹ تیار کرلی ہے۔.دوسری جانب پولیس کے تفتیشی افسر نے ماہم سے زیادتی کے بعد قتل کیس میں کہا کہ ایسا لگتا ہے کہ قتل اور زیادتی کرنے والا کوئی قریبی تھا اور بچی شناخت نہ کرلے اسے لئے قتل کیا گیا۔
تفتیشی افسر کا کہنا تھا کہ ڈی این اے آنے کے بعد مزید صورتحال واضح ہوگی، واقع میں ملوث عناصر کو گرفتارکرلیں گے۔ادھر گورنرسندھ نے واقعہ کا سخت نوٹس لیتے ہوئے ایڈیشنل آئی جی کراچی سے رپورٹ طلب کرلی اور ملوث افراد کو جلد گرفتار،قرار واقعی سزا دلانے کا حکم دیتے ہوئے کہا مہذب معاشرے میں ایسے واقعات نا قابل برداشت ہیں۔
یہ بھی پڑھیں۔کئی با ر بالی وڈ میں کام کی پیشکش ہوئی مگر میں نے انکا ر کیا ۔۔مہوش حیات کا انکشاف