قومی اسمبلی میں وزیر اعظم کےخلاف تحریک عدم اعتماد پیش ۔جمعرات کو بحث ہوگی 

 (24نیوز)قومی اسمبلی میں اپوزیشن لیڈر شہباز شریف نے وزیراعظم عمران خان کیخلاف تحریک عدم اعتماد پیش کردی جس پر 31مارچ مارچ جمعرات کو بحث شروع ہوگی ۔
پیر کو قومی اسمبلی کااجلاس ڈپٹی اسپیکر قومی اسمبلی قاسم خان سوری کی زیر صدارت ہوا ۔اجلاس کے ایجنڈے میں وزیراعظم عمران خان کے خلاف عدم اعتماد کی تحریک بھی شامل تھی جو ڈپٹی اسپیکر قاسم سوری کی اجازت کے بعد ایوان میں پیش کی گئی ۔ اپوزیشن لیڈر شہبازشریف نے تحریک پیش کرتے کہا کہ قومی اسمبلی کے رولز اینڈ پروسیجر اینڈ کنڈکٹ آف بزنس 2007 ذیلی شق 4 کے تحت وزیراعظم کے خلاف جمع کرائی گئی تحریک عدم اعتماد پیش کر رہا ہوں۔شہباز شریف کی جانب سے تحریک عدم اعتماد پیش کرنے کے بعد ارکان کی گنتی کی گئی اس موقع پر حکومتی اتحادی مسلم لیگ (ق) اور ایم کیو ایم کے ارکان اور پاکستان تحریک انصاف کے منحرف ارکان ایوان میں موجود نہیں تھے ،قومی اسمبلی میں تحریک عدم اعتماد بحث کےلئے اپوزیشن کے 161 ارکان کی حمایت پر منظور کرلی گئی جس پر اپوزیشن لیڈر شہبازشریف نے تحریک پیش کی کہ اس ایوان کی رائے ہے کہ عمران خان وزیراعظم پاکستان قومی اسمبلی پاکستان کے ارکان کی اکثریت کا اعتماد کھو چکے ہیں لہٰذا انہیں عہدے پر فائز نہیں رہنا چاہئے ، تحریک پیش ہونے کے بعد ڈپٹی سپیکر نے اجلاس جمعرات 31 مارچ شام چار بجے تک ملتوی کر دیا اس روز تحریک پر بحث ہو گی۔اس سے قبل ازیں ڈپٹی اسپیکر نے ایجنڈے میں شامل چھٹے نمبر پر شامل آئٹم پیش کرنے کے اجازت دی اور ملتان سے حکمران جماعت پاکستان تحریک انصاف (پی ٹی آئی) کے رکن قومی اسمبلی زین حسین قریشی نے 26 ویں آئینی ترمیمی بل 2022 (جنوبی پنجاب صوبے) کی قرارداد پیش کی۔قائد حزب اختلاف شہباز شریف نے ڈپٹی اسپیکر پر اعتراض کرتے ہوئے کہا کہ ابھی آپ نے ایوان میں جو آئٹم پیش کرنے کی اجازت دی وہ غیرمناسب تھی، اس لئے کہ عدم اعتماد کی قرارداد ایوان میں پہلے آچکی تھی۔قومی اسمبلی کے ایجنڈے میں وزیراعظم عمران خان کے خلاف اپوزیشن کی جانب سے پیش کی گئی عدم اعتماد کی قرارداد اور حکومت کا پیش کردہ جنوبی پنجاب صوبے کے قیام سے متعلق آئینی ترمیم بل شامل تھا۔

یہ بھی پڑھیں:گاڑیوں کی قیمتوں سے متعلق اہم خبر
  یاد رہے کہ مشترکہ اپوزیشن نے 8 مارچ کو وزیراعظم عمران خان کے خلاف تحریک عدم اعتماد جمع کرانے کے ساتھ ہی قومی اسمبلی کے اجلاس کی ریکوزیشن جمع کرائی تھی۔

یہ بھی پڑھیں:پنجاب یونیورسٹی کاسپلیمنٹری اورسالانہ امتحانات 2022 کے شیڈول کا اعلان