وزیر داخلہ محسن نقوی کا لاہور میں ماڈل چلڈرن ہوم کا دورہ ، سہولیات کا جائزہ لیا

(اویس کیانی)محسن نقوی کا نگران وزیراعلیٰ کی حیثیت سے لگایا پودا تنا ور درخت بن گیا، لاہور انسٹیٹیوٹ آف ہیلتھ سائنسز کی زیر نگرانی سمن آباد میں جدید سہولتوں سے آراستہ پہلے ماڈل چلڈرن ہوم کا قیام عمل میں آ گیا۔

وفاقی وزیر داخلہ محسن نقوی نے ماڈل چلڈرن ہوم کا دورہ کیا، بے سہارا و یتیم بچوں کے لیے ماڈل ہوم میں فراہم کردہ سہولتوں کا جائزہ لیا۔وزیرداخلہ محسن نقوی نے بچوں کے کمروں، واش رومز اور کیفے ٹیریا کا معائنہ کیا۔

لاہور انسٹیٹیوٹ آف ہیلتھ سائنسز کے سربراہ گوہر اعجاز اور سلطان گوہر نے وزیر داخلہ محسن نقوی کو پراجیکٹ پر بریفنگ دی، وزیر داخلہ محسن نقوی نے بچوں میں عیدی اور عید گفٹس تقسیم کئے۔وزیر داخلہ محسن نقوی نے دو بھائیوں حیدر علی اور ابراہیم علی کو اپنے پاس بلایا، ساتھ بٹھایا اور دونوں بھائیوں سے شفقت کا اظہار کیا۔

محسن نقوی نے کرکٹ کھیلنے والے بچے کامران سے ملاقات کی اور بچے کو اکیڈمی آنے کی دعوت دی، عید گفٹ وصول کرتے ہوئے آبدیدہ ہونے والے بچے کو پیار کیا اور دلاسہ دیا۔

اس موقع پر وفاقی وزیر داخلہ محسن نقوی نے تقریب سے خطاب کرتے ہوئے کہا کہ 2023 میں رات گئے بے آسرا بچوں کے اس ادارے کا دورہ کیا، ادارے کی حالت انتہائی خراب تھی، اسی رات گوہر اعجاز کو فون کیا۔

انھوں نے بتایا کہ واٹر فلٹریشن پلانٹ میں بہت زیادہ مٹی، کمروں کی حالت خستہ، کچن میں گندگی اور کیڑے مکوڑے پائے گئے، بچوں کو کوئی سنبھالنے والا نہیں تھا، کئی کئی دن سٹاف نہیں آتا تھا۔

وزیر داخلہ نے کہا کہ بچے حقیقی معنوں میں انتہائی بری حالت میں زندگی بسر کر رہے تھے۔ ایسے حالات تھے کہ انسان کے رونگھٹے کھڑے ہو جاتے تھے، گوہر اعجاز کو کہا کہ یہ کام سرکار کسی بھی صورت نہیں کرسکتی۔

محسن نقوی نے کہا کہ زیادہ خوشی کی بات ہے کہ گوہر اعجاز کے کام کو ان کے بیٹے سلطان گوہر بہترین انداز میں آگے لے کر گئے ہیں، اللہ تعالیٰ جزا دے۔

گوہر اعجاز نے بتایا کہ محسن نقوی کی رات 2 بجے کال آئی اور انہوں نے ابتر صورتحال پر افسوس کا اظہار کیا، محسن نقوی نے بحالی کی ذمہ داری سونپی، میں نے زبان دی اور اللہ تعالٰی نے کامیاب کیا۔

یہ بھی پڑھیں:مختلف ممالک کے سفرا کی صدر مملکت آصف زرداری سے ملاقات