(ویب ڈیسک )ٹوئٹر کی فروخت اور ایلون مسک کی جانب سے اس میں بڑی تبدیلیاں کرنے کے بعد کچھ صارفین متبادل سوشل میڈیا پلیٹ فارمز کی تلاش میں ہیں۔ ٹوئٹر کی تنزلی سے جن پلیٹ فارمز کا فائدہ ہوا ان میں سے ایک ماسٹوڈان ہے لیکن یہ ہے کیا؟ماسٹوڈان کے مطابق اس وقت اس کے ساڑھے چھ لاکھ سے زیادہ صارفین ہیں۔ ان میں سے ڈھائی لاکھ کے قریب گذشتہ ہفتے ہی نیٹ ورک میں شامل ہوئے ہیں۔
جہاں ٹوئٹر پر صارفین ٹویٹ کرتے ہیں، وہیں ماسٹوڈان پر صارفین ’ٹوٹس‘ کرتے ہیں جن کا جواب دیا جاسکتا ہے، انھیں لائیک مل سکتا ہے اور انھیں شیئر یا ری پوسٹ کیا جا سکتا ہے۔ صارفین ایک دوسرے کو فالو بھی کر سکتے ہیں۔مگر اس کے علاوہ، اس کا نظام کچھ مختلف ہے۔ یہی وجہ ہے کہ نئے صارفین اس کی طرف متوجہ ہوئے ہیں جبکہ نئے لوگوں کو سائن اپ میں پریشانی کا سامنا ہے۔

یہ پلیٹ فارم چھ سال پرانا ہے لیکن فی الحال اس پر سرگرمیاں تیزی سے بڑھ رہی ہیں اور نئے صارفین کے آنے سے اسے خود بھی مشکلات درپیش ہیں۔
ماسٹوڈان پر سرورز کیا ہیں؟

سائن اپ کے دوران جو پہلا کام آپ کو کرنا ہوگا وہ ہے سرور کا انتخاب۔ یہاں بہت سے سرور ہیں جنھیں ملک، شہر یا دلچسپی کے اعتبار سے تقسیم کیا گیا ہے، جیسے برطانیہ، سوشل، ٹیکنالوجی، گیمنگ وغیرہ۔
اس سے فرق نہیں پڑتا کہ آپ کون سا سرور استعمال کرتے ہیں کیونکہ آپ دوسرے سرور والوں کے ساتھ بھی رابطہ قائم کرسکتے ہیں تاہم اس سے آپ کی ذاتی دلچسپیوں کا اندازہ ہوتا ہے اور یہ کہ آپ کس برادری میں زیادہ پائے جائیں گے۔
ان میں سے سوشل اور برطانیہ دو مقبول سرور ہیں اور یہ زیادہ طلب کی وجہ سے سست روی کا شکار ہیں۔رائن والڈ اس ایپ میں برطانیہ کا سرور چلا رہے ہیں۔ وہ کہتے ہیں کہ ایک دن میں چھ ہزار سے زیادہ نئے صارفین آئے لہذا رجسٹریشن روکنا پڑی ہے۔
’میں دیکھنا چاہتا تھا کہ اس کی اتنی ہائپ (مقبولیت) کیوں ہے۔ میں نے جمعے کی شب رات دس بجے سرور لگایا اور صبح اٹھ کر معلوم ہوا کہ ایک ہزار لوگ نیٹ ورک میں شامل ہو گئے ہیں۔ مجھے نہیں معلوم تھا کہ یہ اتنا جلدی اثر کرے گا۔‘

Ok, I’ve joined #Mastodon but also this pic.twitter.com/2Uue7E4BR8

— Sinéad Crowley (@SineadCrowley) November 4, 2022

آپ یہاں دوسروں کو کیسے تلاش کرتے ہیں؟

جس سرور کا آپ انتخاب کرتے ہیں، یہ آپ کے یوزر نیم (نام) کا حصہ بن جاتا ہے۔ جیسے اگر آپ کا ٹوئٹر ہینڈل زیڈ ایس کے ہے اور آپ نے برطانیہ کے سرور کا انتخاب کیا تو آپ کا ماسٹوڈان پر نام ہوگا: @zsk@mastodonapp.uk۔
آپ اسی ایڈریس سے کسی کو تلاش کرسکتے ہیں۔
اگر دو لوگ ایک ہی سرور پر ہیں تو آپ کسی کے نام سے اسے سرچ کرسکتے ہیں لیکن اگر آپ مختلف سرورز پر ہیں تو پورا ایڈریس ڈالنا ہوگا۔
ٹوئٹر کے برعکس ماسٹوڈان آپ کو ایسے صارفین تجویز نہیں کرے گا جن میں آپ دلچسپی لیں۔ آپ یہاں ہیش ٹیگ کی مدد سے بھی سرچ کرسکتے ہیں۔

یہاں سرورز آخر ہیں ہی کیوں؟

ماسٹوڈان اپنے اندر صرف ایک واحد پلیٹ فارم نہیں۔ یہ پلیٹ فارم کسی ایک شخص یا کمپنی کی ملکیت نہیں۔ مختلف سرورز کو ایک ساتھ جوڑا گیا ہے اور اجتماعی نیٹ ورک بنایا گیا ہے۔ اس کی ملکیت مختلف لوگوں اور اداروں کے پاس ہے۔
اسی لیے اسے ڈی سینٹرلائزڈ (مرکزیت نہ ہونا) کہا جاتا ہے۔ اس نظام کے حامی دعویٰ کرتے ہیں کہ اس طرح اس پلیٹ فارم کو محض ایک شخص کنٹرول نہیں کر پائے گا اور نہ ہی خرید یا بیچ سکے گا۔
تاہم اس کے کچھ نقصان بھی ہیں۔ اگر ایک فرد یا ادارہ، جو اس کا کوئی ایک سرور چلا رہا ہے، اپنے سرور کو بند کر دے تو آپ کا اکاؤنٹ ختم ہوجائے گا۔ ماسٹوڈان نے سرور مالکان سے کہا ہے کہ وہ اپنے سرور بند کرنے سے پہلے صارفین کو تین ماہ کا نوٹس دیں۔

ٹوئٹر کے بانی جیک ڈورسی بھی ایک سوشل میڈیا نیٹ ورک پر کام کر رہے ہیں جس کا نام ’بلیو سکائی‘ ہے۔ انھوں نے کہا ہے کہ وہ بھی اسے ڈی سینٹرلائزڈ بنانا چاہتے ہیں۔

ماسٹوڈان کی نگرانی کون کرے گا؟

اصل سوال تو یہی ہے۔ فی الحال تمام سرورز کے اپنے اپنے قوائد و ضوابط ہیں اور کچھ جگہوں پر کوئی اصول نہیں۔
بعض سرورز نے خود کو ایسے سرورز سے دور کر لیا ہے جہاں بہت زیادہ بوٹس اور نفرت انگیز مواد ہے۔ جو سرور ایک جگہ بلاک کیا گیا ہے اس کا مواد وہاں نظر نہیں آتا جبکہ ایک سرور میں کسی پوسٹ کو رپورٹ بھی کیا جا سکتا ہے مگر صرف اسی سرور کے مالک کو۔نفرت انگیز تقریر یا غیر قانونی مواد جانچ کر سرور مالکان اسے حذف کر سکتے ہیں مگر اس کا یہ مطلب نہیں کہ یہ مواد ہر جگہ سے ڈیلیٹ ہوجائے۔
اگر یہ پلیٹ فارم مزید بڑا ہوتا ہے تو یہ ایک پیچیدہ مسئلہ بن سکتا ہے۔

کیا یہاں کوئی اشتہارات ہیں؟
نہیں۔ اس پلیٹ فارم پر اشتہارات نہیں۔ ایسے کوئی قوائد نہیں جو آپ کو کسی کمپنی یا اشیا کی تشہیر سے روکیں۔
ماسٹوڈان میں فی الحال ٹوئٹر کی طرح آپ کو مخصوص مواد نظر نہیں آتا جس کی آپ توقع کرتے ہیں۔ آپ صرف یہ دیکھتے ہیں کہ آپ کے فالوورز کیا کہتے ہیں۔
کیا یہ مفت ہے؟
یہ اس بات پر منحصر ہے کہ آپ کون سا سرور استعمال کرتے ہیں۔
کچھ سرور آپ سے ڈونیشن کے طور پر پیسے لیتے ہیں مگر اس ایپ کا ایک بڑا حصہ استعمال کے لیے بالکل مفت ہے۔