(ویب رپورٹ) بالی ووڈ اداکارہ شلپا سیٹھی کا کہنا ہے کہ ’’ہم نے کیا کرنا چاہا اور کیا نہیں ، آخر میں ہم ہی اس کیلئے ذمہ دار ہوتے ہیں ۔ اگر ہم خوش قمست ہوئے تو دوستوں اور اہل خانہ کا ساتھ ملتا ہے ، لیکن کبھی نہ کبھی ہمیں فیصلہ لینا پڑتا ہے اور اپنی ذمہ داری نبھانی پڑتی ہے ‘‘۔
بھارتی نجی ٹی وی چینل کی ویب رپورٹ کے مطابق اداکارہ شلپا شیٹھی نے انسٹاگرام سٹوری میں ایک کتاب کا صفحہ شیئر کیا ہے ، جس کو پڑھ کر لگتا ہے کہ وہ کوئی بڑا فیصلہ کرنے والی ہیں اور ان کے مداحوں کے ذہن میں اس پوسٹ کے حوالے سے کئی طرح کے سوالات پیدا ہو رہے ہیں۔ تاہم اداکارہ کی پوسٹ سے واضح نہیں ہے کہ وہ کس طرح کا فیصلہ کریں گی ۔
اداکارہ کے شوہر کی فحش فلمیں بنانے کے الزام میں گرفتاری اور پھر جیل یاترا کے دوران شلپا شیٹھی نے اس مشکل دور میں خود کو مثبت بنائے رکھا ۔ وہ سوشل میڈیا پر اپنی زندگی کی جھلکیاں مداحوں کے ساتھ شیئر کرتی رہی ہیں اور اپنی پوسٹ سے لوگوں کو متاثر کرتی رہی ہیں ۔انسٹاگرام پر تازہ پوسٹ میں اداکارہ شلپا شیٹھی شیئر کئے گئے صفحہ میں لکھا ہے ’’ ہم نے کیا کرنا چاہا اور کیا نہیں ، آخر میں ہم ہی اس کیلئے ذمہ دار ہوتے ہیں ۔ اگر ہم خوش قمست ہوئے تو دوستوں اور اہل خانہ کا ساتھ ملتا ہے ، لیکن کبھی نہ کبھی ہمیں فیصلہ لینا پڑتا ہے اور اپنی ذمہ داری نبھانی پڑتی ہے‘‘ ۔ صفحہ میں مزید لکھا ہے ’’صحیح ہوگا یا غلط ، یہ ہم پر منحصر کرتا ہے ۔ ہم گہری سانس لے کر مشوروں پر دھیان دیتے ہیں اور اپنے تجربہ سے وہ کرتے ہیں ، جو ہمیں صحیح لگتا ہے ۔ اگر چیزیں کام کرتی ہیں تو ہمیں اطمینان ہوتا ہے اور اگر ایسا نہیں ہوتا ہے تو ہم اس کی ذمہ داری لیتے ہیں اور آگے بڑھ جاتے ہیں ‘‘۔صفحہ کے آخر میں لکھا ہے کہ میں لوگوں کے مشورے اور سپورٹ کافی لیتی ہوں ، لیکن آخر میں جانتی ہوں کہ اپنی زندگی کا سب سے بڑا فیصلہ مجھے ہی لینا ہے ۔
یاد رہے کہ بھارتی بزنس مین راج کندرا کو فحش فلمیں بنانے کے جرم میں ممبئی کرائم برانچ نے 19 جولائی کو گرفتار کیا تھا ۔ کئی دنوں تک جیل میں بند رہنے کے بعد وہ 20 ستمبر کو ضمانت پر رہا ہوئے ۔ راج کندرا کی گرفتاری کا اثر سب سے زیادہ ان کی اہلیہ اور بالی ووڈ اداکارہ شلپا شیٹھی پر پڑا ہے ۔اداکارہ شلپا شیٹھی کو گزشتہ دنوں کافی ٹرولنگ کا سامنا کرنا پڑا تھا ۔ حالانکہ ضمانت کے بعد جب سے راج کندرا گھر لوٹے ہیں ، تب سے شلپا اور نہ ہی راج نے اس پر اپنا کوئی رد عمل ظاہر کیا ہے جبکہ شلپا سوشل میڈیا پر مسلسل سرگرم رہیں ۔
یہ بھی پڑھیں: بشریٰ انصاری نے ڈراما ’ذرا سی عورت‘ کا سین شیئر کر دیا