ایران کے مقدس مقامات کی زیارت۔۔پی آئی اے نے 5 سال بعد پروازیں بحال کردیں

 (24نیوز)پی آئی اے کی جانب سے ایران کے شہر مشہد کیلئے پانچ سال کے وقفے کے بعد پروازوں کا باقاعدہ آغاز کردیا گیا ہے۔
تفصیلات کے مطابق پہلی پرواز پی کے119 کے ذریعے165 مسافر لاہور سے مشہد روانہ ہوئے۔اس حوالے ذرائع نے بتایاکہ مشہد کی پروازیں پہلے سے شروع کی گئی نجف، بغداد اور دمشق کی پروازوں کے سلسلے کی کڑی ہیں۔ مشہد کی پرواز کے ساتھ زائرین کی تمام مقدس مقامات کی رسائی ممکن ہوگئی۔
سی ای او پی آئی اے ایئر مارشل ارشد ملک نے اپنے پیغام میں کہا ہے کہ مشہد کی پروازیں خصوصی طور پر زائرین کی سہولت کے لئے چلائی جارہی ہیں کیونکہ براہ راست پروازیں زائرین کا دیرینہ مطالبہ تھا۔ایئر مارشل ارشد ملک نے کہا کہ پی آئی اے زائرین کو مقدس مقامات تک پہنچانے کے مذہبی فریضہ میں ہمیشہ پیش پیش رہی ہے اور آئندہ بھی اپنی خدمات پیش کرتی رہے گی، ان پروازوں سے زائرین کو براہ راست اور آسان سفر کی سہولت میسر آگئی ہے۔
ترجمان پی آئی اے نے بتایاکہ مشہد کی براہ راست پروازوں کے آغاز سے دونوں ہمسایہ ممالک کے مختلف گروپوں کی ایک دوسرے کے ممالک میں نقل و حرکت میں اضافہ ہوگا، جس میں ایران میں مقدس مقامات کی زیارت اور تجارتی و تجارتی وفود کا تبادلہ بھی شامل ہے۔قومی ایئرلائن کے ترجمان نے کہا کہ پی آئی اے زائرین کی سہولیات کے لئے شام، عراق اور ایران کے سیکٹر پر پروازوں میں اضافہ پر بہت زیادہ توجہ دے رہا ہے تمام مقدس مقامات پی آئی اے کے نیٹ ورک میں آجائیں گے۔
یہ بھی پڑھیں۔خاتون رکن اسمبلی کو تھپڑ مارنے کا معاملہ۔۔۔شگفتہ جمانی کا موقف بھی سامنے آگیا