(ویب ڈیسک)سینئراداکارہ و میزبان سعدیہ امام نے اشنا شاہ کی اداکاری پر اظہار مایوسی کرتے ہوئے کہا ہے کہ مجھے اس کی اداکاری سمجھ نہیں آرہی۔
سعدیہ امام "24 نیوز" کے مقبول شو "کیا ڈراما ہے" میں بطور نقاد نظر آرہی ہیں،جہاں وہ مختلف ڈراموں کے کانٹینٹ، اداکاری اور ہدایت کاری سمیت دیگر پہلوؤں پر تبصرہ کرتی ہیں،مکرم کلیم اس پروگرام کے میزبان ہیں۔
حال ہی میں سعدیہ امام نے ڈرامے"اے عشق جنوں" میں اشنا شاہ کی اداکاری پر تبصرہ کرتے ہوئے انہیں تنقید کا نشانہ بنایا جس میں وہ پہلی مرتبہ شہریار منور کے ساتھ ایمن کے مرکزی کردار میں نظر آرہی ہیں۔
سعدیہ امام نے پروگرام میں گفتگو کرتے ہوئے کہاکہ مجھے اس ڈرامے میں اشناشاہ کی اداکاری سمجھ نہیں آرہی، وہ اچھی خاصی اداکارہ تھیں، اب کیا ہوگیا۔
انہوں نے اداکارہ کے ماضی کے ایک ڈرامے کا حوالہ دیتے ہوئے مزید کہا کہ اس نے جویریہ عباسی کے ساتھ ایک ڈرامے میں کام کیا تھا جس میں مجھے اس کی اداکاری بےحد پسند آئی تھی، تو وہی اداکاری "ایمن" کے کردار میں کیوں نہیں نظر آرہی؟
سعدیہ امام کا مزید کہنا تھا کہ وہ(اشنا شاہ)ایک قابل اداکارہ تھیں،وہ ان کی صلاحیتوں سے بے حد متاثر ہوئی تھی تو اب وہ اداکارہ کہاں گئی؟
ڈرامے پر مزید بات کرتے ہوئے سعدیہ امام کا کہنا تھا کہ مجموعی طور پر ڈراما اچھا ہے، کچھ سینز بھی معقول ہیں، تاہم وہ اداکاری سے مطمئن نظر نہیں آئیں۔
ڈرامہ"اے عشق جنوں" کی ہدایت کاری کے فرائض قاسم علی مرید نے انجام دیئے ہیں جبکہ ڈرامہ کی کہانی سعدیہ اخترنے لکھی ہے،اسے سکس سگما پروڈکشن نے پروڈیوس کیا ہے۔
اس ڈرامہ کی کاسٹ میں شہریار منوراور اشنا شاہ کے علاوہ شجاع اسد، ماہ نور حیدر، محمد احمد، سہیل سمیر، شبیر جان، ارسا غزل، محمود اسلم اوردیگر شامل ہیں۔