وزیر اعظم شہبازشریف کا ازبک صدر سے رابطہ، عید کی مبارکباد دی

(اویس کیانی)وزیر اعظم پاکستان اور ازبکستان کے صدر کے درمیان ٹیلی فونک رابطہ ،وزیراعظم شہبازشریف نے ازبکستان کے صدر شوکت مرزیوئیف سے ٹیلی فونک رابطہ کیا،وزیراعظم نے ازبک صدر اور ازبکستان کے عوام کو  عید کی مبارکباد دی اور دونوں ممالک کے عوام کی امن و خوشحالی کیلئے دعا کی۔ 

صدر شوکت مرزیوئیف نے وزیر اعظم اور پاکستانی عوام کیلئے بھی نیک خواہشات کا اظہار کیا ۔ انہوں نے صدر آصف زرداری اور سابق وزیراعظم نواز شریف کو بھی عید کی مبارکباد دی۔ 

دونوں رہنماؤں نے فروری میں وزیر اعظم کے کامیاب دورہ ازبکستان کے بعد دو طرفہ تعلقات کی مثبت رفتار پر اپنے اطمینان کا اظہار کیا۔ انہوں نے متعدد شعبوں میں پاکستان ازبکستان تعاون کو مزید مستحکم کرنے کیلئے دورے کے دوران کئے گئے اہم فیصلوں پر عملدرآمد کو یقینی بنانے کیلئے قریبی رابطے میں رہنے کے اپنے عزم کا اعادہ کیا۔ اہم شعبوں میں  دو طرفہ تعاون میں پیش رفت کے حوالے سے دونوں فریقوں کی جانب سے باہمی طور پر شناخت کئے گئے اہداف کا ایک "روڈ میپ" وضع کیا گیا ہے۔

 وزیراعظم نے مزید کہا کہ چیئرمین سینیٹ کا آئندہ دورہ ازبکستان ہمارے دوطرفہ تعلقات کو مزید مضبوط بنانے میں بھی مفید ثابت ہوگا۔ وزیر اعظم نے صدر شوکت مرزیوئیف کو جلد ہی پاکستان کا سرکاری دورہ کرنے کیلئے اپنی دعوت کا اعادہ کیا۔