ملتان روانگی سےقبل مریم نواز کوامام ضامن باندھا گیا

(24نیوز)اللہ آپ کو نظر بد سے بچائے۔ مریم نواز  کو چاہنے والوں نے پی ڈی ایم  جلسے میں شرکت کیلئے ملتان روانگی سے قبل امام ضامن باندھا ،جاتی امرا میں بکرے کا صدقہ بھی دیا گیا۔

تفصیلات کے مطابق مسلم لیگ ن کی نائب صدرمریم نواز کی ملتان روانگی سے قبل جاتی امرا میں بکرے کا صدقہ دیا گیا۔اس موقع پر متوالیوں نے اپنی قائد کو امام ضامن بھی باندھا اور ملتان جلسہ کی کامیابی کیلئے دعا بھی کی۔جاتی امرا میں مریم نواز  کی رہائشگاہ کے باہر لیگی کارکنوں کی جانب سے شدید نعرے بازی  بھی کی گئی ۔

اس موقع پر مریم نواز نے میڈیا سے گفتگو کرتے ہوئے کہا کہ مجھے تیسری بار بھی گرفتاری کا کوئی خوف نہیں ہے۔انہوں نے کہا کہ گرفتاریوں کے خوف سے دیواریں پھلانگنے والی نہیں، بغیر کسی گناہ کے دو مرتبہ جیل کاٹ چکی ہوں لہٰذا مجھے تیسری بار بھی گرفتاری کا کوئی خوف نہیں مجھے گرفتار کیا بھی گیا تو کوئی ایشو نہیں ہے۔