پاکستان میں ٹیسٹ سیریز کے دوران انگلینڈ میں بین سٹوکس کےگھر چوری

(24 نیوز ) پاکستان میں ٹیسٹ سیریز  کیلئے آنے والے انگلینڈ ٹیسٹ ٹیم کےکپتان  بین سٹوکس کے گھر  چوروں نے صاف کر دیا ۔

چوری کی واردات بین اسٹوکس کے ڈرہم کاؤنٹی میں واقع گھر میں ہوئی،  بین اسٹوکس نے چوری کی واردات اور  اپیل سوشل میڈیا پوسٹ پر کی ہے،سوشل میڈیا پوسٹ میں بین اسٹوکس کا کہنا تھا کہ17 اکتوبر کی شام چند ماسک پہنے لوگوں نے میرے گھر چوری کی،  وہ جیولری، قیمتی اشیاء اور  ذاتی استعمال کی اچھی خاصی چیزیں ساتھ لےگئے۔

 بین اسٹوکس کا کہنا تھا کہ کچھ اشیاء کے ساتھ میرا اور میری فیملی کا جذباتی لگاؤ تھا، میری یہ اپیل ان افراد کو تلاش کرنے میں مدد کے لیے ہے،  یہ جرم اس وقت کیا گیا جب میری اہلیہ دو  چھوٹے بچوں کے ساتھ گھر پر تھیں، شکر ہے فیملی کو کسی طرح کا جسمانی  نقصان نہیں پہنچا تاہم  اس واردات کی وجہ سے ان پر  ذہنی طور  پر اثر  پڑا ہے۔

بین اسٹوکس کا کہنا تھا کہ  میں چوری ہونے  والی چند اشیاء کی چیزیں بھی شیئر کر رہا ہوں، اس کا مقصد صرف ان لوگوں  کو  پکڑنا ہے، اگر  آپ کے پاس کوئی معلومات ہیں تو ڈرہم کانسٹیبلری سے رابطہ کریں، میں پولیس کا شکریہ ادا کرتا ہوں جب واردات ہوئی میں پاکستان میں تھا تو پولیس نے فیملی کی غیر معمولی سپورٹ کی، پولیس اب بھی ان لوگوں کی تلاش کے لیے بہت کام کر رہی ہے۔