عمران خان سے مخلص ہوں،پرویز خٹک کی وضاحت

(24نیوز)وزیر دفاع پرویز خٹک نے نوشہرہ میں کارکنوں سے خطاب میں کہی گئی اپنی بات کی وضاحت کرتے ہوئے کہا کہ عمران خان سےمخلص ہوں۔

ٹوئٹر پر جاری بیان میں وزیر دفاع  نے کہا کہ میں نے اپنے خطاب میں یہ واضح کیا تھا کہ میں عمران خان سے مخلص اور ان کا ممنون ہوں۔انہوں نےکہا کہ ہماری کامیابی مستقل طور پر ہماری کاوشوں اور عمران خان کے تعاون کی وجہ سے ہے۔

وزیر دفاع کا کہنا تھا کہ ہم الیکشن میں ہمارے مخالفین کے خلاف اکٹھا ہونے والی تمام جماعتوں کو شکست دیں گے۔

 واضح رہے کہ نوشہرہ میں خطاب کرتے ہوئے پرویز خٹک کاکہنا تھا کہ میں نہ چاہوں تو عمران خان کی حکومت ایک دن بھی نہیں چل سکتی لیکن عمران خان کے مجھ پر بہت احسانات ہیں ، اس لئے تن من دھن سے عمران خان کے ساتھ ہوں۔