(24نیوز) وفاقی وزیر برائے آبی وسائل خورشید شاہ نے کہا کہ لوگوں کے ذہنوں میں خلفشار بھرا گیا ہے کہ سیاستدان ووٹ لیکر صرف عیاشی کرتے ہیں،میری کوشش ہے کہ اس ملک کے عوام کی زیادہ سے زیادہ خدمت کروں۔
تفصیلات کے مطابق سکھر میں تقریب سے خطاب کرتے ہوئے خورشید شاہ کا کہنا تھا میں تقریب میں ٹائم پر اس لئے آیا تاکہ آپ کو احساس ہو کہ سیاستدان ووٹ لیکر عیاشی نہیں کرتے بلکہ خدمت گار ہوتے ہیں،انہوں نے طالب علموں سے مخاطب ہو کر کہا کہ آپ اپنے علاقے کے بچوں کو پڑھائیں تاکہ زیادہ سے زیادہ بچے تعلیم یافتہ ہوں اور اپنے ملک و علاقے کی ترقی میں کردار ادا کرسکیں۔
خورشید شاہ نے کہا کہ مجھے کسی نے تصویر بھیجی کہ بچی زمین پر بیٹھ کر تعلیم حاصل کر رہی ہے، ہم نے 24 گھنٹوں کے دوران اس سکول میں 400 کرسیاں فراہم کیں، عوام کو مسائل سے باہر نکالنے کےلئے دن رات ایک کر دیں گے۔