میرا اسکرپٹ خدا کی طرف سے آتا ہے،کوئی تبدیلی نہیں کرنے دیتا،خلیل الرحمٰن قمر

(ویب ڈیسک)معروف مصنف خلیل الرحمٰن قمر نے دعویٰ کیا ہے کہ ان کی جانب سے لکھا گیا اسکرپٹ انہیں خدا کی طرف سے آتا ہے اور وہ صرف اپنی تحریروں کے محافظ ہوتے ہیں۔

خلیل الرحمٰن قمر نے حال ہی میں ایک پوڈکاسٹ میں شرکت کی جہاں مختلف معاملات پراپنے خیالات کااظہارکیا۔

پروگرام کے دوران ایک سوال کے جواب میں انہوں نے ہالی ووڈ کو پاکستانی انڈسٹری سے کمتر قرار دیتے ہوئے دعویٰ کیا کہ پاکستان میں ہالی ووڈ سمیت تمام دنیا سے زیادہ ٹیلنٹ موجود ہے۔

معروف ڈرامہ نگاراورفلمسازکا کہنا تھا کہ ہالی ووڈ  ہم سے وسائل اور پیسوں میں آگے ہے، ان کے پاس بہت پیسے ہیں اس لیے ان کا کام اچھا نظر آتا ہے،جو کام ہمارے ہاں صرف 50 لاکھ روپے میں ہوتا ہے،اسی کام پر ہالی ووڈ میں 50 لاکھ ڈالر لگائے جاتے ہیں، جس کی وجہ سے وہاں کا کام بڑا نظر آتا ہے۔

خلیل الرحمٰن قمر کا کہنا تھا کہ ٹیلنٹ کسی کا محتاج نہیں ہوتا،ٹیلنٹ جاپان،امریکا اور بھارت کا محتاج نہیں، اگر ہمارے پاس بھی وسائل ہوں تو ہم ہالی ووڈ سے اچھی فلمیں بنا سکتے ہیں،ہمارے ہاں کم بجٹ نہیں بلکہ انتہائی قلیل بجٹ میں فلمیں اور ڈرامے بنتے ہیں، جس کی وجہ سے ہم پیچھے ہوتے ہیں ورنہ ہمارے پاس ٹیلنٹ کی کوئی کمی نہیں۔

یہ بھی پڑھیں:احسن محسن سے شادی والدہ کی مرضی کے خلاف کی؟منال خان کاانکشاف

ایک اورسوال کے جواب میں خلیل الرحمٰن قمر کا کہنا تھا کہ وہ اپنے اسکرپٹ میں ایک لفظ کی بھی تبدیلی کرنے کی اجازت نہیں دیتے کیونکہ وہ اپنے اسکرپٹ کے محافظ ہوتے ہیں،چونکہ ان کے پاس اللہ کی طرف سے اسکرپٹ آتا ہے،وہ صرف اس کے محافظ ہوتے ہیں اس لیے وہ اپنے اسکرپٹ میں کوئی تبدیلی نہیں کرنے دیتے۔