(ویب ڈیسک) امریکی فوجی ہیلی کاپٹر اور مسافر طیارے میں تصادم کے نتیجے میں ہلاک ہونے والی خاتون ملٹری آفیسر ریبیکا لوباچ کے حوالے سے مزید معلومات منظر عام پر آئی ہیں۔ ریبیکا لوباچ کو متعدد میڈلز سے نوازا گیاتھا جبکہ وہ ماہر پائلٹ اور انسان دوست بھی تھیں۔
رپورٹ کے مطابق امریکی ملٹری ہیلی کاپٹر کے مسافر طیارے سے ٹکرانے کے واقعے میں 67 افراد ہلاک ہوگئے تھے،ریبیکا لوباچ اپنے دو ساتھی اہلکاروں سمیت ہیلی کاپٹر تصادم میں ہلاک ہوگئی تھیں، اس حوالے سےامریکی فوج نے تصدیق کی ہے کہ ملٹری ہیلی کاپٹر اور مسافر طیارہ تصادم میں ہلاک ہونے والوں میں ایک خاتون اہلکار بھی شامل ہیں۔
عالمی خبر رساں ادارے کے مطابق ہلاک ہونے والی خاتون، ملٹری آرمی ایوی ایشن آفیسر 28 سالہ ربیکا لوباچ تھیں جو2019 سے فوج سے منسلک تھیں۔ربیکا بولاچ کا تعلق شمالی کیرولینا کے شہر ڈرہم سے تھا اور انھوں نے آرمی کمنڈیشن میڈل، آرمی اچیومنٹ میڈل، نیشنل ڈیفنس سروس میڈل اور آرمی سروس ربن سمیت متعدد اعزازات حاصل کئے تھے۔ خاتون ملٹری آفیسر نے وائٹ ہاؤس کے فوجی سماجی معاون کے طور پر بھی سرکاری کاموں میں بھی رضاکارانہ مدد کی تھی۔اس حوالے سے ربیکا لوباچ کے اہل خانہ، دوستوں اور ساتھی اہلکاروں نے کہا کہ یہ بہت بڑا نقصان ہے وہ انسان دوست اور ایک ماہر پائلٹ تھیں۔
یاد رہے کہ ریگن ایئرپورٹ پر طیارے سے ٹکرانے پر ہلاک ہونے والے ہیلی کاپٹر میں سوار دیگر دو اہلکاروں کی شناخت اسٹاف سارجنٹ 28 سالہ ریان آسٹن اوہارا اور چیف وارنٹ آفیسر 39 سالہ اینڈریو لائیڈ ایوز کے ناموں سے ہوئی۔
یہ بھی پڑھیں:پستول کے ساتھ مستی، دوست نے دوست کی جان لے لی