(ملک اشرف) پاکستان تحریک انصاف(پی ٹی آئی) نے 8 فروری کو لاہور مینار پاکستان میں جلسے کیلئے لاہور ہائیکورٹ سے رجوع کر لیا۔
تفصیلات کے مطابق چیف آرگنائزر پنجاب پی ٹی آئی عالیہ حمزہ نے درخواست دائر کی،درخواست میں پنجاب حکومت ،چیف سیکرٹری ، ڈپٹی کمشنر سمیت دیگر کو فریق بنایا گیاہے۔
درخواست میں موقف اپنایا گیا ہے کہ 8 فروری کو مینار پاکستان میں جلسے کی اجازت کے لیے ڈپٹی کمشنر لاہور کو درخواست دی، 29 جنوری کو درخواست دائر کی گئی مگر ابھی ڈپٹی کمشنر آفس میں کوئی بھی شنوائی نہیں ہوئی،پی ٹی آئی جب بھی جلسے کی اجازت مانگتی ہے تو امن و امان کا مسئلہ بنا لیا جاتا ہے ۔
درخواست میں یہ بھی کہا گیا ہے کہ عالیہ حمزہ کو ہراساں کیا جا رہا ہے، درخواست واپس لینے کے لیے دھمکیاں دی جا رہی ہیں۔
علاوہ ازیں، درخواست میں استدعا کی گئی ہے کہ8 فروری کو مینار پاکستان پر جلسے کی اجازت دی جائے اور پی ٹی آئی کے بے گناہ کارکنان کو ہراساں کرنے اور اغوا کرنے سے روکا جائے۔
یہ بھی پڑھیں: جلسےکیلئے پنجاب کے نہیں خیبرپختونخوا کے عوام پر انحصار کرتے ہیں، جنید اکبر خان