مشہور نیپالی چائلڈ سنگر نوعمری میں انتقال کرگئے

(ویب ڈیسک)نیپال کے تعلق رکھنے والا کم عمر گلوکار سچن پریار 15 سال کی عمر میں انتقال کرگئے۔

گلوکار سچن پریار نے اپنے گانے 'اوتھا کھولرا' کے ذریعے بے شمار مقبولیت حاصل کی تھی، اسپتال کے ذرائع کے مطابق 15 سالہ سچن کی 2 جنوری کی صبح کھٹمنڈو کے تریبھون یونیورسٹی ٹیچنگ اسپتال میں علاج کے دوران وفات ہوگئی۔

جمعرات کو جاری کردہ ایک بیان میں اسپتال نے تصدیق کی کہ سچن پریار صحت کے مختلف مسائل کےلیے پانچ سال سے زیادہ عرصے سے وہاں علاج کروا رہے تھے۔

سچن کو پیدائشی سہ رخی وینٹریکولرسسٹ کی تشخیص ہوئی تھی اور اس بیماری سے نمٹنے کے لیے ان کی نیورو سرجری کی گئی تھی اس کے علاوہ وہ ذیابیطس کے مریض بھی تھے جس کی وجہ سے انہیں روزانہ ادویات کی ضرورت پیش آتی تھی۔

سچن پریار کو 28 دسمبر کو شدید بخار، دورے اور مدہوشی کی حالت میں اسپتال منتقل کیا گیا تھا ان کی حالت تیزی سے بگڑتی گئی جس کے نتیجے میں نمونیا، متعدد اعضاء کی خرابی، گردے کی شدید چوٹ، انسیفالوپیتھی، شدید انفیکشن اور خون بہنے کی خرابی جیسی پیچیدگیاں سامنے آئیں۔

پیڈیاٹرک آئی سی یو میں انتہائی نگہداشت، وینٹی لیٹر سپورٹ، اینٹی بائیوٹکس اور خون کی منتقلی کے باوجود سچن کی حالت بگڑتی گئی۔

اسپتال میں داخل ہونے کے پانچویں دن، شدید پلمونری خون بہنے کی وجہ سے آکسیجن کی کمی پیدا ہوئی اور اس کے بعد دل کا دورہ پڑا۔

سچن پریار نے کئی اہم پروجیکٹس میں اپنی آواز اور اداکاری کا مظاہرہ کیا تھا جن میں گانا ’’بار کو چھانلے‘‘ بھی شامل تھا اس گانے میں گلوکارہ کملا گھمیرے، کرونا رائے، اور گووندا پاوڈل کے ساتھ راجیش ہمل بھی شریک تھے۔

سچن پریار کی شہرت کا باعث گانا ’’اوتھا کھولرا‘‘ ہے، جس کی میوزک ویڈیو میں ان کی گلوکاری اور اداکاری دونوں کی مہارت کو واضح طور پر دیکھا جا سکتا ہے۔ یہ ویڈیو 2 جنوری تک یوٹیوب پر 19 ملین سے زائد مرتبہ دیکھی جا چکی تھی۔

یہ بھی پڑھیں:سچی محبت کےلیے اداکاری بھی چھوڑسکتی ہوں،یشما گل