دوسری شادی کے بعد زندگی خوب صورت گزر رہی ہے،عمیرجسوال

(ویب ڈیسک)معروف اداکارہ ثنا جاوید کے سابق شوہر گلوکار عمیر جسوال نے پہلی بارثناء جاوید سے اپنی طلاق اور دوسری شادی سے متعلق گفتگوکی ہے۔

عمیر جسوال گزشتہ ماہ  اکتوبر  کے آغاز پردوسری بار رشتہ ازدواج میں منسلک ہوئے تھے جس کا اعلان انہوں نے انسٹاگرام پر ایک تصویر شیئر کرکے کیا،انہوں نے انسٹاگرام پردلہا بنے اپنی تصویر پوسٹ کی اور ساتھ کیپشن میں "الحمداللہ" اور قرآن شریف کی آیت بھی لکھی جس کا مطلب تھا " آپ کا رب عنقریب آپ کو اتنا کچھ عطا فرمائے گا کہ آپ راضی ہو جائیں گے۔"

اب عمیر جسوال نے سرکاری ٹی وی کے ایک پروگرام میں شرکت کی جس میں میزبان کی جانب سے انہیں شادی کی مبارک باد پیش کی گئی اور ساتھ ہی شادی کے بعد تبدیل ہونے والی زندگی سےمتعلق پوچھاتومعروف گلوکار نے کہا کہ مجھے شادی کے لیے مبارکباد دینے کا شکریہ ، شادی کے بعد زندگی خوبصورت گزر رہی ہے۔

اپنی طلاق سے متعلق ڈھکے چھپے الفاظ میں عمیر جسوال نے کہاکہ خدا مجھ پر بہت مہربان رہا ہے،اللہ ہمیشہ انسان کو ایک سفر کے ذریعے صحیح مقام پر پہنچاتا ہے، اور جب آپ کو تقدیر درست مقام پر پہنچادیتی ہے تب آپ کو احساس ہوتا ہے کہ اللہ نے آپ کو ایک مخصوص سفر سے کیوں گزارا، پھر آپ اللہ کا شکر ادا کرتے ہیں۔

عمیرجسوال نے کہا کہ میں نے سوشل میڈیا پر بہت سے لوگوں سے بات کی تھی جو کافی پریشان تھے، مجھے پیغامات موصول ہوئے اور ناصرف میرے مداح بلکہ دیگر افراد بھی میرے لیے فکر مند تھے،میں انہیں یہی سمجھا رہا تھا کہ اللہ کو یہ ایسے ہی منظور تھا۔

عمیرجسوال نے کہا شادی کے اعلان کے بعد مجھے غیر معمولی ردعمل ملا، ایک تصویر سے ہی مداح اتنا خوش ہوئے، میں بہت خوش ہوں کہ لوگ مجھ سے محبت کرتے ہیں اور میرے لیے نیک خواہشات کا اظہار کرتے ہیں۔

یہ بھی پڑھیں:شاہ رخ خان کی قیمتی گھڑی،قیمت سن کرسب دنگ رہ جائیں گے

 واضح رہے کہ گلوکار عمیر جسوال کی پہلی شادی اداکارہ ثنا جاوید سے اکتوبر 2020 میں ہوئی تھی، گزشتہ سال جوڑے کے درمیان علیحدگی کی افواہوں نے اس وقت زور پکڑا جب دونوں نے اپنے اپنے انسٹاگرام سے نکاح کی تصاویر ڈیلیٹ کردیں،پھررواں سال جنوری میں عمیرجسوال اور ثناجاوید کی علیحدگی کی تصدیق اس وقت ہوئی جب ثناجاوید اور پاکستان کرکٹ ٹیم کے سابق کپتان شعیب ملک کی شادی کی خبر سامنےآئی۔