کھانا کم پڑ گیا ،ہال میں شروع ہونیوالی شادی کا تھانے میں انجام
Stay tuned with 24 News HD Android App
(24 نیوز)بھارت کے شہر سورت میں ایک جوڑے کی شادی کا آغاز تو ہال میں ہوا تاہم اس کا اختتام تھانے میں ہوا۔
بھارتی میڈیا کے مطابق سورت شہر میں جوڑے کی شادی کی تمام رسومات مکمل ہو گئی تھیں صرف گلے میں ہار ڈالنے باقی تھے کہ شادی کو اچانک روک دیا گیا،میڈیا رپورٹس کے مطابق اتوار کو شادی کو دولہا کے گھر والوں نے مبینہ طور پر تقریب میں کھانا ختم ہونے کی وجہ سے روکا۔
ڈپٹی کمشنر پولیس الوک کمار کے مطابق دونوں خاندانوں میں کھانے کی مبینہ کمی پر جھگڑا ہوا جس کے بعد دولہا کے خاندان نے شادی کی باقی رسم کرنے سے انکار کر دیا،ڈی سی پی کے مطابق دلہن دولہا کے خاندان کے رویے سے پریشان ہوئی جس کے بعد اس نے پولیس سے رابطہ کیا اور کہا کہ لڑکا شادی کے لیے تیار ہے لیکن اس کے گھر والے راضی نہیں ہیں۔
مزید پڑھیں:کیا بھارتی ادکارہ اور کینیڈا کی پولیٹکل پارٹی ورکر جسٹن ٹروڈو کے بعد وزیر اعظم بن پائیں گی؟
پولیس کے مطابق اس سارے معاملے کے بعد اس کے حل کے لیے دولہا اور دلہن سمیت ان کے گھر والوں کو بھی پولیس اسٹیشن بلایا گیا،پولیس کی مداخلت اور مدد کے بعد دولہا کے خاندان نے شادی کو مکمل کرنے پر رضامندی ظاہر کی تاہم یہاں بھی یہ کیس مکمل طور پر حل نہیں ہوا کیونکہ دلہن نے شادی ہال میں واپس آنے کی صورت میں دوبارہ لڑائی کا امکان ظاہر کیا۔
بھارتی میڈیا کے مطابق لڑکی کے خدشے کے پیشِ نظر پولیس نے جوڑے کو شادی کی بقیہ رسمیں تھانے ہی میں مکمل کرنے کی اجازت دی۔