خوبصورت اداکاراؤں کو کامیابی آسانی سے مل جاتی ہے:سیدنور

(ویب ڈیسک)نامور ہدایت کاراورمصنف سیدنورنے کہاہے کہ خوب صورت اداکاراؤں کو کامیابی آسانی سے مل جاتی ہے۔

"شومین آف لالی ووڈ"سید نور نےفلمی دنیا میں بے شمار نئے چہروں کو متعارف کروایا ہے،وہ بھارتی فلموں کی پاکستان میں نمائش کے خلاف سب سے تواناآوازرہے ہیں اورآج بھی پاکستانی فلم انڈسٹری کی بقاکی جنگ لڑرہے ہیں۔

سیدنور حال ہی میں ایک شو میں بطور مہمان شریک ہوئے، جہاں انہوں نے پاکستانی فلموں اور اداکاروں کے حوالے سے اپنی رائے کا اظہار کیا، شوبز میں خوب صورتی کی اہمیت پر گفتگو کرتے ہوئے انہوں نے کہا کہ خوب صورت خاتون اداکاراؤں کو کامیابی حاصل کرنے میں زیادہ آسانی ہوتی ہے۔

جب ان سے سوال کیا گیا کہ شوبز میں اداکاروں کی شکل و صورت کتنی اہم ہوتی ہے تو سید نور نے ایک منفرد نقطۂ نظر پیش کرتے ہوئے کہاکہ ایک ہیرو صرف اپنی اچھی شکل و صورت کی بنیاد پر کامیاب اداکار نہیں بن سکتا۔

انہوں نے کہا کہ دنیا کے بہترین اداکار زیادہ خوبصورت نہیں تھے بلکہ انہوں نے اپنی اداکاری کی مہارت پر توجہ دی اور اسی وجہ سے کامیاب ہوئے۔

سیدنور نے کہا کہ اگر کسی خاتون اداکارہ کی خوبصورتی نمایاں ہو تو اسے کامیابی حاصل کرنے میں زیادہ آسانی ہوتی ہے کیونکہ ناظرین ایسی اداکاراؤں کو زیادہ پسند کرتے ہیں۔

یہ بھی پڑھیں:دوریاں دلوں میں بڑھتی ہی جا رہی ہیں:دھرمیندرکی تازہ پوسٹ پرمداح پریشان

سید نور نے مزید کہا کہ عوام کی نظر میں ایک حسین اداکارہ کی موجودگی اس کے مقبول ہونے کے امکانات کو بڑھا دیتی ہے۔