(ویب ڈیسک)ہالی ووڈ کی معروف اداکارہ نکول کڈمین نے ایک بار پھر دنیا کی سب سے زیادہ معاوضہ لینے والی اداکارہ کا اعزاز اپنے نام کرلیا۔
فوربس میگزین کی تازہ ترین رپورٹ کے مطابق، نکول کڈمین نے 2024 میں مجموعی طور پر 41 ملین ڈالر کمائے جن میں سے 31 ملین ڈالر ان کا خالص منافع تھا۔
فوربس کی فہرست میں ٹاپ 20 میں صرف تین خواتین شامل ہیں، اور ان میں سے کوئی بھی نوجوان نہیں ہے۔ 57سالہ نکول کڈمین اس فہرست میں سب سے اوپر ہیں۔
نکول کڈمین نے 2024 میں کئی ہائی پروفائل پروجیکٹس کے ذریعے کامیابی حاصل کی، انہوں نے تین مشہور شوز میں مرکزی کردار ادا کیا، جن میں دی پرفیکٹ کپل، لائنس،اورایکسپیٹس شامل ہیں جس میں انہیں ہر قسط کےلیے 1 ملین ڈالر معاوضہ ملا۔
اس کے علاوہ، نکول کڈمین دو رومانوی فلموں بے بی گرل اور اے فیملی افیئر میں بھی جلوہ گر ہوئیں جو کامیاب ثابت ہوئیں ۔
نکول کڈمین نے 17 سال بعد دوبارہ فوربس کی اس فہرست میں ٹاپ پر آنے کا اعزاز حاصل کیا ہے، اس سے قبل 2007 میں بھی وہ دنیا کی سب سے زیادہ معاوضہ لینے والی اداکارہ بنی تھیں جب ان کی آمدنی 28 ملین ڈالر تھی۔
ٹاپ 20 میں شامل دیگر دو خواتین 61 سالہ مارسیکا ہیریٹیگے اور 40 سالہ اسکارلٹ جوہانسن شامل ہیں جنہوں نے 2024 میں 25 ملین ڈالر سے زیادہ کمائے۔
یہ بھی پڑھیں:صبافیصل بھی سجل علی کی آنکھوں کی خوبصورتی کی معترف
فوربس کے مطابق،ہالی وڈ کے مختلف نمائندوں کا کہنا ہے کہ نوجوان اداکاراؤں کی مستقبل کے پروجیکٹس کےلیے فیس میں نمایاں اضافہ ہوا ہے، اور انہیں بُک کرنا اب بہت مشکل ہوچکا ہے۔