(24نیوز) محکمہ موسمیات نے ملک کے بیشتر حصوں میں بارشوں کی پیشگوئی کردی۔
محکمہ موسمیات کے مطابق خیبرپختونخوا، بالائی پنجاب اور شمال مشرقی بلوچستان میں بارش متوقع ہے،جبکہ اسلام آباد میں آج رات کو تیز ہواؤں کے ساتھ چند مقامات پر بارش کا امکان ہے۔
بلوچستان کے اضلاع ژوب، موسیٰ خیل، بارکھان، قلعہ سیف اللہ اور قلات میں بھی بارش متوقع ہے،جبکہ خضدار اور گردو نواح میں تیز ہواؤں اورگرج چمک کے ساتھ بارش کا امکان ہے۔
پنجاب کے علاقوں راولپنڈی، اٹک، چکوال، جہلم، تلہ گنگ اور میانوالی میں بھی بارش کا امکان ہے۔ حافظ آباد، گوجرانوالہ، منڈی بہاؤالدین، گجرات اور سیالکوٹ میں بھی بادل برسیں گے،نارووال، لاہور، شیخوپورہ اور فیصل آباد میں بارش اور بعض مقامات پر ژالہ باری کا امکان ہے، جبکہ مری، گلیات اور گردونواح میں گرج چمک کے ساتھ بارش ہوسکتی ہے۔
خیبرپختونخوا کے بیشتراضلاع میں موسم خشک اور گرم رہنے کا امکان ہے،تاہم چترال، دیر،سوات، مالاکنڈ،شانگلہ، کوہستان اور بٹگرام میں بارش متوقع ہے،مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی اور کرم میں بھی بارش ہو سکتی ہے۔ پشاور، چارسدہ، نوشہرہ اور صوابی میں بھی گرج چمک کے ساتھ بارش کا امکان ہے۔
گلگت بلتستان اور آزاد کشمیر کے مختلف علاقوں میں تیز ہواؤں اور گرج چمک کے ساتھ بارش ہو سکتی ہے جبکہ سندھ کے بیشتر اضلاع میں موسم شدید گرم اور خشک رہے گا۔
لاہورشہر میں درجہ حرارت میں نمایاں اضافہ ہونے لگااورشہر کا موجودہ درجہ حرارت30 ڈگری سینٹی گریڈ ریکارڈکیاگیاہے۔آج زیادہ سے زیادہ درجہ حرارت 39ڈگری تک جانے کا امکان ہے۔
یہ بھی پڑھیں:زیبابختیار سے پہلے بھارتی فلم "حنا" کی پیشکش کس پاکستانی اداکارہ کو ہوئی تھی؟
پی ڈی ایم اے کے مطابق ہوا میں نمی کا تناسب39 فیصد تک جا پہنچاہے،گرمی ،اورلو کی شدت میں اضافے سے عوام کو محتاط رہنا ہو گا،۔
شہر میں فضائی آلودگی بھی بدستور برقرارہے اورایئر کوالٹی انڈیکس 183 ریکارڈکیاگیاہے،لاہور آلودہ ترین شہروں کی فہرست میں پہلے نمبر پر آ گیاہے۔