(ویب ڈیسک)مقبول اداکارہ نوال سعید نے کہا ہے کہ اگرچہ وہ بالی ووڈ کے دبنگ ہیرو سلمان خان کی بہت بڑی مداح ہیں، تاہم بطور اداکار انہیں منوج باجپائی بہت پسند ہیں۔
نوال سعید نے حال ہی میں نجی ٹی وی کی پوڈکاسٹ میں شرکت کی، جہاں مختلف معاملات پر کھل کر بات کی۔
پروگرام کے دوران گفتگو کرتے ہوئے نوال سعیدنے بھارت میں اپنی مقبولیت پر حیرانی کا اظہار کرتے ہوئے کہا کہ انہیں معلوم نہیں کہ وہاں وہ کیسے مشہور ہوئیں؟،انہیں اندازہ نہیں تھا کہ بھارت میں ان کے اتنے مداح ہوں گے لیکن انہیں یہ جان کر خوشی ہوئی کہ ان کے مداح وہاں موجود ہیں۔
نوال سعید کا کہنا تھا کہ اگرچہ انہوں نے ایسا کوئی کام یا پراجیکٹ نہیں کیا، جس وجہ سے وہ بھارت میں بھی مقبول ہوتیں، تاہم ممکنہ طور پر سوشل میڈیا پیجز کی جانب سے ان کی شیئر کردہ تصاویر اور میمز کی وجہ سے وہ وہاں مقبول ہوئیں۔
انہوں نے بتایا کہ انہیں وہاں سے مداح پیغامات بھیجتے ہیں اور ان سمیت تمام پاکستانی ڈرامہ اداکاروں کی تعریفیں کرتے ہیں،جس طرح بھارت کی فلمیں مشہور ہیں اور انہیں یہاں دیکھا جاتا ہے، اسی طرح پاکستانی ڈرامے بھی بھارت میں مقبول ہیں اور انہیں وہاں دیکھا جاتا ہے۔
ایک سوال کے جواب میں نوال سعید کا کہنا تھا کہ اگرچہ انہیں بھارت جاکر کام کرنے کی خواہش نہیں ، تاہم اگر دونوں ممالک کے تعلقات اچھے ہوجائیں اور ایک دوسرے کے ساتھ کام کرنے لگیں تو بہتر ہے،آرٹ اور ثقافت کی کوئی سرحد نہیں ہوتی اور اگر دونوں ممالک کے تعلقات اچھے ہوجائیں اور فنکار مل کر کام کریں تو بہتر ہے، تاہم وہ پاکستانی ڈراموں میں اپنی اداکاری سے مطمئن ہیں۔
نوال سعید کا کہنا تھا کہ اگرچہ وہ سلمان خان کی مداح ہیں، تاہم بطور اداکار انہیں منوج باجپائی بہت پسند ہیں اور وہ ان کی اچھی اچھی فلمیں دوسروں کو دیکھنے کا مشورہ بھی دے سکتی ہیں، راج کمار راؤ بھی اچھی اداکاری کرتے ہیں اور ان کی زیادہ تر فلمیں انتہائی اچھی ہیں۔
یہ بھی پڑھیں:کبریٰ خان اور گوہررشید کی "گیم نائٹ"،جیت کس کے نام رہی؟
نوال سعید نے مداحوں کو مشورہ دیا کہ وہ منوج باجپائی کی فلم "علی گڑھ" لازمی دیکھیں۔